Julie Berthelsen Aqqaluk Lyngelu WWF-ip siulittaasoqarfiuanut ilaasortanngortut
Siulittaasoqarfik 50-it missaannik ilaasortaqartoq, Kunngikkormiutut Ataqqinassusilimmit Prins Henrikimit siuttuuffigineqarpoq taannalu suliniaqatigiiffimmi aamma qullersatut oqartussaasuulluni.
- Siulittaasoqarfimmut ilaasortanngornissannik neqeroorfigineqarnera assut nuannaajallaatigivara, Julie Berthelsen, ilaasortanngortitsinerup kingorna nereqatigiinnermi Dronningip uianik issiaqarteqartoq, taama oqarpoq.
Siulittaasoqarfiup kalaallinit nuimasunit ilaasortaqalernera Gitte Seebergip nuannaarutigaa:
- Suliniaqatigiiffiuvugut oqaloqatigiinnissamik anguniagaqartoq, Juliemillu Aqqalummillu immersorneqarnerput assut qujamasuutigaarput. Taakkumi Issittumi Kalaallit Nunaannilu ukiuni kingullerni sulinitsinni pingaarutilimmik inissisimasimapput, Gitte Seeberg, nunarsuarmi pinngortitamik avatangiisinillu illersuiniaqatigiiffimmi WWF-imi qullersaasoq taama oqarpoq.
Professor Minik Rosing siulittaasoqarfimmut aamma ilaasortaavoq Finn Lyngeugaluarlu aamma ilaasortaasimalluni.
Pinngortitamik avatangiisinillu illersuiniaqatigiiffiup WWF-p Danmarkimi immikkoortortaqarfia Prins Henrikimit 1072-imi pilersinneqarpoq. WWF-ilu nunarsuaq tamakkerlugu 1961-imi tunngavilerneqarpoq ullumikkullu nunani 100-nit amerlanerusuni suliaqarpoq 5 millionillu sinnerlugit ilaasortaqarluni.
WWF-p pingaarnertut anguniagaa tassaavoq nunarsuami pinngortitap illersugaanissaa aammalu nunarsuaq inuit uumasullu ataatsimoorfigisinnaasaat.