Politikki

Juliane suliffimmi misilittagaqarusuppoq

Juliane Henningsenip ilinniakkani naammassereerlugit sulinerup iluani misilittagaqarusunnini pissutigalugu ukiut qulit Inatsisartuni ilaasortaareerluni novembarip aallaqqaataaniit tunualerpoq

Allattoq Ivik Kristiansen, Jonas Løvschall-Wedel

oktobarip 02-at 2015 14:21

- Politikkikkut sulineq ukiut qulit ingerlatereerpara. Oqimaassimavoq, nuannersimavoq, pissanganarsimalluni ilikkagaqarnarsimallunilu. Kisianni maannakkut ingerlariaqqikkusullunga qamanerpiaq malugisinnaavara. Ilinniakkatigut kisianni aamma suliffimmi misilittakkakka annertuserusuppakka. Minnerunngitsumillu ilaqutariittut inuunitsinnut pitsaanerpaamik toqqaallunga misigisimavunga, Juliane Henningsen Halibut Greenlandimi atorfinittussanngornini pillugu taama oqarpoq.

Inatsisartunut qinersineq kingulleq ukioq ataasinnguliinnartorlu Juliane Henningsen Inatsisartuninngaanniit tunuartussanngorpoq.

Aamma atuaruk Juliane Henningsen Inatsisartunut ilaasortaanerminit tunuarpoq

Inuunermili pisussat tamarmik pilersaarusiorneqarsinnaanngitsut taanna nassuiaavoq.

- Inuunermi suut tamarmik pilersaarusiorneqarsinnaaneq ajorput. Taanna oqaatigilluaannarsinnaavara. 21-nik ukioqarlunga politikkikkut qinigaavunga, ukiullu qulit kingulliit pilersaarutaasimanngillat. Kisianni sulerusussusimma taama ingerlatippaanga, unalu periarfissaq massakkut takkuttoq uannut annertummat taanna tigorusussimallugu, Juliane Henningsen oqarpoq.

Pakatsisoqassappat paasisinnaavaa

Qinersinermi kingullermi Julianne Henningsen 138-init qinerneqarpoq.

Taakkunanilu pakatsisoqassappat, Juliane Henningsenip paasisinnaavaa.

- Inuit pakatsissappata paasisinnaavakka. Kisianni oqarsinnaavunga, politikkikkut anguniakkat, suliallu maannakkut suliarisakka allanngoratik nanginneqartussaapput, Juliane Henningsen oqarpoq.

Qinersinermi ajorsartut

Inuit Ataqatigiit ukiup siuliani naalakkersuisunngortitsinissartik neriuutigigaluarpaat. Qinersinerli allatut inerneqarpoq. taannali tunuarnerminut pissutaaqataanngitsoq Henningsen oqarpoq.

- Inuit Ataqatigiinni politikkikkut suleqataaninni suut tamaasa aqqusaartarnikuuakka. Naalakkersuisooqataaneq, illua tungiliuttuunerluunniit uannut apeqqutaanerpaaneq ajorpoq. Ataatsimiititaliani, oqaluttarfimmi inuiaqatigiillu akornanni suliassaq ataasiujuaannarpoq. Taanna imminermini aalajangeeqataanngilaq, Juliane Henningsen oqarpoq.

Inuit Ataqatigiit Inatsisartunut sinniisussaat Hans Aronsen Juliane Henningsenip tunuarneratigut Inatsisartunut ilaasortanngoqqissaaq.

Nutaarsiassami kukkunermik nassaarsimaguit uunga allaffigineqarsinnaavugut.