Juliane Henningsen Inatsisartunut ilaasortaanerminit tunuarpoq
Juliane Henningsen Inatsisartuni ilaasortaaminit tunuarpoq suliffeqarfimmi Halibut Greenlandimi pisortamut allatsinngortitut atorfininni pissutigalugu.
Aalisakkanik tunisassiorfimmi Ilulissaniittumi Juliane Henningsen atorfininnermini illoqarfimmut angerlarsimaffigisaminut nuussaaq, Inuit Ataqatigiit tusagassiuutinut nalunaaruteqarlutik taama allapput.
Tamanna pillugu 31-nik ukiulik Julianne Henningsen oqarpoq, aalajangerneq imaannaasimanngitsoq ataatsimulli isigalugu ingerlariaqqinnissaq allanillu sammisaqarnissaq kajungeringaluttuinnarsimallugu.
Inuit Ataqatigiit Siulersuisuuneri sinnerlugit, Siulittaasoq Sara Olsvig ima oqarpoq: - Juliane ukiuni qulini
kingullerni Nunatsinni politikkikkut imaannaanngitsumik angusaqarfiusimaqisumillu suliaqarpoq, Inatsisartuni Folketingimilu qinikkatut sulinermigut Sara Olsvig oqarpoq.
- Politikeritut inuusuttutut aqqutissiuussisuusimavoq siuttuullunilu suliassallu annertuut artornarsinnaasimagaluarpataluunniit kivittarsimallugit, IAmi siulittaasoq Sara Olsvig Juliane Henningsenip inatsisartuni ilaasortaanerminit tunuarneranut atatillugu taama oqarpoq.
Halibut Greenlandip pisortaata Niels Thomsenip Juliane Henningsen ilitigingajappaa, Ilulissanilu peroriartornikuullutik, Juliane Henningsenilli piginnaasai aallaavigalugit atorfinitsinneqarsimasoq, Niels Thomsenip oqaatigaa:
- Suliffeqarfittut alliartortutut pisariaqartipparput pikkorissunik piumassuseqartunillu sulisoqarnissarput, Niels Thomsen, Juliane Henningsenip atorfinitsinneqarneranut atatillugu KNR-imut oqarpoq.
