Juliane Henningsen: Sulineq ajorluinnarsimavoq
Aalajangiiffigisassatut siunnersuummut atatillugu Inuit Ataqatigiit oqaaseqartitaata Kalistat Lundip oqaatigaa Inuit Ataqatigiit aqutsisooqqilissagaluarpata uranimut apeqqut qaqeqqinneqarumaartoq, innuttaasullu peqataatinneqarnerunissaat eqqarsaatigalugu innuttaasunik taasititsisoqarnissaanik sulisoqassagaluartoq. Juliane Henningsen isumaqataavoq, uranisiortoqalissappallu kingunerisinnaasai innuttaasunut paasititsiniutigissallugit:
- Suliassarput pingaartoq tassaavoq uranisiornerup kingunerisinnaasai aamma politikeritut siammartissallugit, aammalu Naalakkersuisut oqarluartaarutigisartagaat innuttaasunik peqataatitsineq. Taassuma timitalersorneqarnissaa malersussavarput, kisianni aamma aningaasarsiorfiusinnaasunik allanik innersuussisarnivut ingerlatiinnassavagut. Aatsitassarsiorneq akerlerinngilarput, kisianni Inatsisartuni sulineq maannakkutut ingerlanneqartillugu amiilaarnaqaaq, aammalu apeqqusertariaqarparput kikkut uani aqutsisoorpiarnersut, Inuit Ataqatigiit sinnerlugit Inatsisartunut ilaasortaq Juliane Henningsen oqarpoq.