Juliane Henningsen: Suleriaaseq qangali atorneqarpoq
Aleqa Hammondip Nukissiorfiit pisortaata nipangersagaasimaneranik oqaaseqarnera pasinarsaarutaannartut oqaatigineqartariaqartoq, Inuit Ataqatigiit politikkikkut oqaaseqartartuata, Juliane Henningsenip tusagassiuutinut ullumi nalunaarutigaa. Nangillunilu Ineqarnermut, Attaveqarnermut Angallannermullu Naalakkersuisup, Jens B. Frederiksenip ippassaq oqaasii taperserlugit oqaatigalugu, partiit imaluunniit Inatsisartunut ilaasortat suliffeqarfinni Naalakkersuisut akisussaaffigisaanni paasisassarsiorniaraagamik, isumaqatigiissuteqaqqarnikkut ilisimatitseqatigiinnikkullu tamanna qangaaniilli pisartoq - suleqatigiinneq ilisimatitseqatigiinnerlu pitsaanerpaatikkumallugit. Paasisassarsiorniarnermilu suleriaaseq qangali ingerlanneqartoq; Qinikkat, partiimit sorlermit aallartitaanertik apeqqutaatinnagu tamarmik naligiimmik sullinneqartariaqartut pisinnaatitaaffeqartariaqartullu, Juliane Henningsen nalunaarummini allappoq. Taamatullu Inuit Ataqatigiit gruppiannit, sammisani aalajangersimasuni ilisimasalinnik aggersaanikkut imaluunniit pulaarnikkut paasisassarsiortarneq ingerlatiinnassallugu, Juliane Henningsen naggasiivoq.
