Juliane Henningsen qinigassanngorteqqinnianngilaq

Juliane Henningsen maanna 26-nik ukioqartoq, siullermik Folketingimut qinigaavoq, 2007-mi novembariugaa, taamani qinersinermi Nunatsinni qinigaanerpaalluni, 4.600-it sinnerlugit qinersiseqarluni. Tassalu manna tikillugu ukiut sisamassaat Folketingimi ilaasortaalluni.

Juliane Henningsenip Folketingimi suliniutaasa pingaarutillit ilagaat, Atlantikup Avannaani Suleqatigiinnerup nukittorsarnissaa, tamannalu tunngavigalugu Juliane Henningsen oqarpoq, ukiuni qulini suleqatigiinneq ingerlareeraluartoq, suli sivisunerusumik IA-p Folketingimi ilaasortaatitaalerumaagaata ingerlateqqissinnaagaa:

- Partiitta aammalu qinigassanngortittussap taanna suliaq ingerlaqeqqissagaa qularutiginngilara, tassami pisariaqarmat ukiuni qulini misilittagarilersimasagut aallaavigalugit, suli nukittoqqilluta Folketingimi saqqummiuttassallugit.

Juliane Henningsen Folketingimi ilaasortaanermi saniatigut, Nunatsinni Inatsisartunut ilaasortaavoq, aperigatsinni siunissami Naalakkersuisunut ilanngutissanersoq, eqqarsaat tamanna takorloorluarsinnaallugu oqarpoq, ilinniagaqarnissanili maanna aalluteqqaarniarlugu oqarluni:

- Uanga meeraallungali ilinniagaqarnissara pingaatippara, taamaattumik ilinniagaqarnerma pilersissavaa, suli nukittornerullunga Naalakkersuinikkut sulisunut ilanngussinnaanera.

Juliane Henningsenimut siunissaq tassa taamaassinnaalluarpoq. Ataguli kingumut qiviaqqilaariarta: Folketingimi ilaasortaanermi nalaani, Juliane Henningsenip suliarisimasani tulluusimaarutigalugit uku eqqaavai, nunat tamalaat suleqatiginerini politikkikkut saqqummiussisinnaaneq, danskisut tuluttullu, aammalu sammisat allat ilikkagassat, naak inuusuttuulluni tamakku sakkortugaluartut:

- Soorunami inuusuttutut Folketingimi ilaasortaalerluni sakkortusimavoq, oqarsinnaasoraagali ilaasortaanera peqqissimissutissaqarfiginagu.

Juliane Henningsen taama oqarpoq. Kingullermik Folketingimut qinersineqarmat, Juliane Henningsen 5.100-it sinnerlugit qinigaavoq.