Juliane Henningsen immikkut pineqaraluarluni oqaaseqarumanngilaq

Radioaviisimi ileqquuvoq inuit apersorneqartussat apeqqutissanik siumoortumik nassinneqartannginnissaat, Juliane Henningsenilli apersoneqarnissaminut tamanna piumasaqaatigimmagu, immikkut iliorluta apeqqutissavut siumoortumik nassiuppagut.

Nunafondenip siulittaasorisimasaanut apeqqutiginiakkagut tassaapput:

-Nunafondenimi siulersuisunut siulittaasuuuninni (2012-2013) ingerlatsinermut aningaasartuutit 2,7 mio. koruuniupput, 3,2 mio. koruuninillu agguaassisoqarluni. Taamatut agguataarisoqarnera qanoq isumaqarfigaajuk?

-2010/11-mi aalajangiunneqarpoq aqutsisuusoq biileqarnermut ukiumoortumik 80.000 koruuninik tapiiffigineqartassasoq. Tamatumunnga ilanngullugu kingumut atuuttumik ukiut siuliinut billeqarnermut 147.000 koruunit akilerneqarput. Taamatut aningaasatuuteqarnissaq sooq pisariaqarsimava?

-Siulersuisunut aningaasartuutit ukiorpassuarni 150.000 koruunit missaaniittarsimapput 08/09-milu 267.000-iullutik, ukiulli tulliini nunarsuarmi aningaasatigut ajornartosiorneq pissutigalugu 150.000-inut appartinneqarput. Sooq ataatsimoortumik akiulitissat 300.000-inut qaffannissaannmik aalajangiussaqarpisi?

-2010/11-mi siulersuisunut akiliutissat 300.000-inut qaffappasi. Peqatigisaanik ukiup siulianut innersuussillusi ilassutitut 134.000-inik akiliivusi. Tamanna sooq pisariaqarsimava?

Aqaguani ullup qeqqata kinguninngua apersorneqarnissaminik neriorsuuteqarmat Radioaviisip tusagassiortuisa Juliane Henningsenip oqaloqateqarnertik kipiinnarpaat.

Aqaguani, apersorneqarnissaq nalunaaquttap akunnerinik marlussunnik sioqqullugu Juliane Henningsen e-mailimik nassiussaqarpoq, allalluni nammineq siulersuisoqatimilu aningaaseriviup aningaasaataanik atuinerlussimanertik oqqaseqarfigiumajunnaarlugu. Radioavimullu ima allappoq:

Apersorneqarusunnanga aalajangerpunga, kisitsisillu imatut oqaaseqarfigissavakka:

"NunaFonden nalinginnaasumik ilaatigut ukiumoortumik 10 mio. kr.-it sinnerlugit iluanaaruteqartarpoq. Nunarsuarmi aningaasarsiornikkut ajornartorsiortoqarnerata nalaani ukiut pingasut ingerlanerini 2,7 mio. kr.-it missaannik isertitaqarsimaneq aningaasaateqarfiup aningaasaliissutaanut soorunami kingunerlutsitsimavoq.

Akissarsianut tunngatillugu oqaatigisinnaavara aqutsisup akissarsiai pisortani allaffimmi pisortap akissarsiaatut amerlassuseqarmata, tamatumalu saniatigut - allatuulli - soraarnerussutisianut akiliuteqartoqartarmat. Aammattaaq nammineq biilini atorpaa, tamatumunngalu ajunngitsorsiassaqartinneqarluni.

Tamatuma saniatigut maluginiarneqassaaq aningaasaateqarfiup inimik attartornermut aningaasartuutai Nuummi namminersortunit attartortoqalerneratigut malunnaatilimmik qaffassimammata.

Siulersuisunut ilaasortat angalanerminni hotellejlighedini assigisaanilu najugaqartaput. Akissarsiat, suliassanut atorfinnut naapertuuttumik siulersuisuusimasunit isumaqatigiissunit akuersissutigineqarsimapput.

NunaFondenip aningaasaliissutini tamaasa nittatakkamini saqqummiuttarpai, naatsorsuutit paasissutissallu allat. Tamatuma saniatigut siulersuisut aningaasaateqarfimmut siunertatut aalajangersarneqartut malillugit ingerlatsinerat aammalu inatsisit atuuttut malllugit ingerlatsinerat tamakkiisumik tatigaara."