Julefrokostertut politiinik ulapaartitsisut
Politiit Nuummi angerlarsimaffinni persuttaasoqarneranut sisamariarlutik aggersarneqarsimapput. Aamma illoqarfimmi imerniartarfiit silataanni perulluliortoqaqqajaasoqarsimavoq. Politiit pingasoriarlutik eqqissisimaneq toqqissimanerlu isumaginiarlugit akuliuttariaqarsimapput. Illoqarfiulli imerniartarfiini eqqissimasoqarlunilu toqqissimasoqarsimanera politiit erseqqissaatigaat.
Tallimanngormat ullaakkut nal. 05.50 arnap ujajaaffigineqarsimalluni nalunaarutigaa, angerlartilluni blok 5-ip silataani angummit inuusuttumit ajanneqarsimavoq taassumalu taskia assigiinngitsunik imaqartoq tillissimavaa. Pinerluttoq pisulluni qimaasimavoq. Kingornatigut ilaatigut politiip qimmianik ikiorserluni paasiniaasoqarnerani angut 16-inik ukiulik tigusarineqarpoq, taassumalu pinerluttuunini nassuerutigisimavaa. Angut inuusuttoq tallimanngormat ualikkut iperagaavoq. Angut inuusuttoq arlaleriarluni tillinniartarsimanermigut politiinit ilisarisimaneqareerpoq, taamaammat pissutsinut assigusunut pinerluttuunersoq maanna misissuiffigineqarpoq.
Qulaani taaneqartut saniatigut politiit angerlarsimaffinni eqqissiviilliornernut qulinut ornigussimapput, aqqusinermi eqqissiviilliornernut pingasunut ornigussimapput kiisalu pisiniarfinnut tillinniarnerit pingasut nalunaarutigineqarsimallutik.
