Josef Motzfeldtimut suliaq politiit unitsippat

Naammattunik uppernarsaatissaqannginneq pissutigalugu Josef Motzfeldtip ikiaroornartumik hashimik anngiortumik peqarsimasutut unnerluutigineqarnissaa Politimesterip taamaatiinnarpaa.

Josef Motzfeldtip Inatsisartuni sulinini aallarteqqikkaa, Inatsisartuni siulittaasup tullia, Olga Poulsen Berthelsen, ullumi ilisimatitsivoq.

Pisoq aallartippoq, pequtinik nutserisup nutserinermi nalaani Josef Motzfeldtip inaani ikiaroornartumik hashimik 0,15 grammimik nassaarsimanini nalunaarutigimmagu. Olga Poulsen Berthelsenilli oqarnera naapertorlugu, Inatsisartut siulittaasuata malersoqqinnissaa Politimesterimit pisariaqartinneqarunnaarpoq.

Josef Motzfeldt ullumikkut pissarsiarisinnaasimanngilarput.

Pisoq politikkikkut aalassassutaangaatsiarpoq. inatsisartunut ilaasortaq, Doris Jakobsen, Siumumeersoq, Naalakkersuisunut qaammat kingulleq apeqquteqarpoq. Tassani paaserusuppaa, qinikkat Naalakkersuisunullu ilaasortat ikiaroornartumik atuisuunnginnerat qulakkeerniarlugu Naalakkersuisut qanoq pilersaaruteqarnersut.

Doris Jakobsenip apeqqutaata Naalakkersuisut siulittaasuat Kuupik Kleist periarfissippaa Doris Jakobsen demokratiip tunngavianik eqqaasissallugu. - Naalakkersuisut Inatsisartullu tusatsiakkat uppernarsarneqanngitsut aqqutigalugit sulisinnaanngillat, politiilli eqqartuussiviillu aalajangigaat naapertortariaqarpaat.

Politimesterip ullumi aalajangiinerata pisoq tassa naggaserpaa.