Josef Motzfeldt Vestnordisk Råd-imi siulittaasunngorpoq
Nunat avannaarliit Killiit siunnersuisoqatigiiffianni nunat ilaasortat pingasuusut, tamakkiisumik nunani avannarlerni suleqatigiinermi peqataanerat Josef Motzfeldtip siulittaasutut ivertinneqarnermini erseqqissarpaa, nunalli taakkua pingasut ataatsimoorlutik immikkut soqutisaqarnerat erseqqissarpaa, nunani avannarlerni sammineqartunut sanilliullugit.
Nunani avannarlerni killerni suleqtigiinnermi ataatsimoorluta soqutigisagut sulissutigalugillu illersortariaqarpagut, nunani ataasiakkaanni taamatullu nunat tamat suleqatigiiffiisa akornanni, Josef Motzfeldt oqarpoq, taamaattumillu nunat tamat suliniaqatigiiffiini nunat avannarliit killiit suleqataanissaat soqutigineqartoq oqaatigalugu.
Nunat tamat suliniaqatigiiffiini nunallu immikkoortuini suleqatigiinneq pingaaruteqarpoq, minnerunngitsumik nunat naalagaaffiillu mikisut, avataanit tusaaniarneqarnissaminnik ajornartorsiuteqartut.
Nunat avannarliit killiit siunnersuisoqatigiiffianni ukiuni tulliuttuni sulinermi ilinniartitaanikkut suleqatigiinneq pingaaruteqarluinnartuusoq oqaatigineqarpoq.
Siunnersuisoqatigiit sapaatip akunneri pingasut matuma siornatigut ilinniagaqarsimanngitsut ilinniarnissaannut periarfissaat pillugut Kalaallit Nunaanni isumasioqatigiipput, nunat avannarliit killiit ilaasortaaffigisaanni tamanna pingaaruteqarluinnartuummat Nunat avannarliit siunnersuisoqatigiiffianni siulittaasutut ivertinneqaqqammersoq Inatsisartu siulittaasuat Josef Motzfeldt oqarpoq.
