Josef Motzfeldt siulittaasuuffigilikkamini arlalinnik pingaartitaqarpoq
Nunani Avannarlerni Killerni sulisartut ilinniagaqarsimanngitsut ilinniaqqinnissaminnut periarfissaqartariqarput, pingaartumik Islandimi suliffissaaleqinerup maanna qaffakkiartornerani, Kalaallit Nunaanni taamatut ilinniarfissanik pisariaqartitsiartornerup nalaani.
Josef Motzfeldtip siunnersuutigaa atorfilinnik Siunnersooqatigiinni anguniagassatut kaammatuutigineqartut atorfilinnit aalajangersimasumik suliarineqarlutik piviusunngortinneqarnissaat qulakkeerneqartariaqartut, taakkualu qinikkanik malinnatitsisariaqartut. Tassa naalakkersuinikkut aalajangersagassat eqqarsaatigalugit. Josef Motzfeldt isumaqarpoq Nunat Avannarliit Killiit Siunnersuisoqatigiivini anguniagassatut kaammatuutigineqartut nunani pineqartuni
piviusunngortinneqartarnissaat pimoorunneqarnerusariaqartut, tassami pilersaarutit naammassineqanngitsut arlalinngorsimammata. Aammattaaq nunat taakkua aalisarnermik inuuniuteqarmata imaani pisuussutit atorneqarneri, aalisarfinnilu pisassiisarnerni periutsit nalimmassaavigineqartariaqartut. Aappagulu ataatsimoorussamik imaani pisuussutit pillugit Islandimi ataatsimeersuartoqassaaq.
Pilersaarutaavoq aalisartut, kattuffiit, nioqqutissiortut, ilisimatuut politikerillu peqataanissaat, ilimagineqarsinnaammammi aamma nunat akunnerminni pisassiisarneri oqallisigineqarumaartut. Nunani Avannarlerni Killerni ataatsimoorussamik pisuussutit pillugit ataatsimeersuarnissaq Islandimi aappaagu juunimi ingerlanneqassaaq.