Jørgen Boassen toqunneqarnissaminik siorasaarneqartoq

Jørgen Boassen USA-mi præsidentinngortoq Donald Trump qineqqusaarnerata præsidentitullu ivertinneqarnerata nalaani USA-miippoq malinnaalluni.

Taassuma Siumumeersoq Inatsisartunut ilaasortaq, Kuno Fencker, USA-mut angalaqatigaa. Taakku USA-mi præsidentinngortup Donald Trumpip præsidentitut ivertinneqarneranut peqataajartorlutik Washington D.C.-miipput. 

Tamanna nunatsinni oqallittoqangaatsialerneranik pilersivoq allaallu politikikkut avissaartuuttoqalerneranik oqalluttoqarluni.

Jørgen Boassen ippassaq pingasunngornermi ullaakkut allagarsivoq, allagarsianilu taassuma KNR-imut ima oqaluttuaraa:

- Allagarsiara ammarakku atuarpara allaqqasoq, nalunnginneriga toqutaalersunga, taanna oqarpoq nangillunilu:

- Kamaammernaq kisianni aamma nukissanik tunisivoq, tassami anguniakkannut, ersinngilanga arlaannik sumilluunniit. Kisianni uuminarpoq assut, takullugu oqarfigerusunnarluni ilumut taamaappisi?

- Tamanna misigalugu assut tupinnarpoq.

Jørgen Boassenip allagarsiani akinngilaa, politiinulli unnerluutigissanerlugu eqqarsaatersuutigaa sulili unnerluussinani taanna oqarpoq.

Jørgen Boassenip USA-mi præsidentip siunnersortaa Tom Dans kujataani angalaqatigeqqammerpaa kujataani niuernikkut takornariaqarnikkullu siuarsaanissamik ussassaarinermillu anguniagaqarlutik.

Taakku maanna Nuummut utersimaqqilereersut Jørgen Boassenip oqaatigaa.