Qeqertarsuup Tunuani umiatsiaararsorluni aalisartunut pisassiissutigineqartut allanngortinneqarput
Nutarterneqarpoq 16.50: Naalakkersuisut aqutsiveqarfimmut Qeqertarsuup Tunuanut umiatsiaararsortunut qaammatinut pingasunut pisassiissutigineqartut ulloq 27. maj-i naleqqussaavigai, qaleralittassiissutigineqartut nungulermata. Tamannalu isumaqarpoq aalisarneq maj-ip 29-viani unitsinneqarani ingerlatiinnarneqassasoq maj-ip 29-viani. Qaammatit pingasukkaartut pingajuanniit 300 tonsit qaammatit pingasukkaartullu sisamaanniit 300 tons-inik pisassiissutinik qaammatit pingasukkaartut aappaannut nuussinerup kingorna naleqqussaavigineqarput.
Qeqertarsuup Tunuani umiatsiaararsorlutik sinerissamut qanittumi qaleralinniat pisassaarutilerput.
Tassa apriliip aallaqqaataaniit juunip naaneranut qaammatinut pingasunut pisassatik 815 tonsiusut nunguleraat, Naalakkersuisut nalunaarput. Aalisartullu sapaatiuppat naggataamik tunisisinnaassapput.
Naalakkersuisullu pisassat pillugit iliuuseqanngippata, pisassiissutit qaammatit pingasukkaartut, juulip aallaqqaataani aatsaat aalisarneqarsinnaalissapput. Tassalu umiatsiaararsortut qaammat ataaseq sinnerlugu qaleralinnik aalisarsinnaassanngillat.
KNR-p aalisarnermut naalakkersuisoqarfik pisassanik allannguiniarnersoq pillugu attaveqarfigaa sulili akissutissarsinani.
Naalakkersuisut pisassat nungukkaangata ukiut siuliini arlaleriarlutik ilasarpaat.
Tamannali ukioq manna pissanngitsoq aalisarnermut siusinnerusukkut naalakkersuisoq, Aqqaluaq B. Egede ukiormannamut siorna decemberimi pisassanik aalajangiinermini nalunaarpoq.
- Naalakkersuisut aalajangerput ukiup ingerlanerani pisassiissutinik ilasisoqartassanngitsoq, Naalakkersuisut tusagassiuutinut taamani allapput.
Naalakkersuisut aamma taamani aalajangerpaat qaammatinut pingasunut qaleralittassiissutigineqartut tamakkerlugit aalisarneqarpata, aalisarneq unitsinneqassasoq, qaammatinullu pingasunut pisassiissutit tullii atuutilerpata aatsaat aalisartoqaqqilissasoq, Naalakkersuisoqatigiit siulii, tassa Inuit Ataqatigiit Nalerarlu siorna taama aalajangerput.
Naalakkersuisut siorna qaammatinit kingullernit pisassiissutinit aallernissaq periarfissaraat. Naalakkersuisut decembarimit, novembarimit oktobarimiillu pisassiissutinit 225 tonsinik marsimi pisassiissutissanngortitsinissartik siorna aalajangerpaat.
Ukiut sisamararterutaanut pisassiissutit
Qeqertarsuup Tunuani 2022-mi qaleralittassiissutit 9.100 tonsiupput. Taakku umiatsiaararsortut aalisariutillu 6 meterinit anginerusut akornanni agguaanneqartussaapput. Umiatsiaararsortut ukioq manna qaleralinnik 4.252 tonsinik aalisarsinnaapput.
4.252 tonsiulu ukiup sisamararterutaanut agguataarneqarput.
Pinngortitaleriffiup qalerallit tunineqartut mikineruleriartuinnarnerat pissutigalugu qaleralittassiissutit ikinnerungaatsiarnissaat ukiorpassuarni innersuussutigisarpaat.
Uumassusilerituut ukioq manna 4.346 tonsit innersuussutigaat, Naalakkersuisulli taakku qaangiungaatsiarlugit katillugit 9.100 tonsit pisassiissutigaat.
