Johansen: Ernumanissaq pisariaqanngilaq
- Ilaasortaanangalu siulittaasuunnginnama qulakkiigaqarsinnaanngilanga. Kisianni siulittaasunngussaguma taanna pingaartissavara, isumalioqatigiissitaq sapinngisamik tamakkiisumik sinniisoqarluni innuttaasunik ataatsimiisitsisassasoq, Lars-Emil Johansen Qanoruumi ataasinngornermi oqarpoq.
AAMMA ATUARUK Tunngaviusumik inatsimmik suliaqarneq taasititseratarsinnaasoq
Tunngaviusumik inatsimmut isumalioqatigiissitami siulittaasoq siulittaasullu tullia naalakkersuisoqatigiinninngaanneersuussapput.
Illuatungiliuttut isumalioqatigiissitap sulinerani sunniuteqaqataasinnaanerat taamaasilluni killilerneqassasoq, Demokraatineersup Michael Rosingip ernumassutigaa.
Ernumassutissaqanngitsorli, siulittaasunngorsinnaasoq oqarpoq.
AAMMA ATUARUK Demokraatit isornartorsiuiaarpallaarput
- Sulineq suli aallartinngitsoq ernumasaarineq aporfissanillu ujaasineq ulapputissaanngilaq. Ulapputissaavoq suliassat pitsaasumik qanoq aallartinneqarsinnaanersut oqaluuserissallugit, Lars-Emil Johansen taama oqarpoq.
Tunngaviusumik inatsimmut isumalioqatigiissitap suliaqarnera Nunatta namminiilivinnissaa pillugu innuttaasunut taasititsinermik kinguneqaratarsinnaanera Michael Rosingip aamma ernummatigaa.
Isumalioqatigiissitaq angalasarlunilu innuttaasunik ataatsimiitsitsisartussaammat tunngaviusumik inatsimmik suliaqarneq innuttaasunik taasititsinermik, politikerit tusaanngitsuusaaginnarsinnaanngisaannik, ukiuni qaninnerni aallartitseqataasinnaasoq, Demokraatineersoq isumaqarpoq.
AAMMA ATUARUK Isertortumik qineqqusaartoqarsinnaanera Rosingip ernummatigigaa
Taamali ernumanissaq pisariaqanngitsoq, Lars-Emil Johansen oqarpoq.
- Demokratiimik illersuisuugaanni, innuttaasut aperinissaat aarlerigisariaqanngisaannarpoq. Soorlu ulorianartutut isumaqarfigineqartoq innuttaasut ima isumaqalersinneqassasut. Naagga, innuttaasut qanoq isumaqarnerat paasiniarneqassaaq, imaanngitsoq isumaqalersinneqarnissaat.
