Joe Bidenip USA-mut tikittut angerlarsimaannarnissaannut piumasaqaatit atulersikkai
Coronavirusip tuniluunnera pakkersimaarniarlugu, USA-p præsidentiata Joe Bidenip peqqussutit qulit sisamanngornermi unnukkut atsiorpai.
Taakkunannga ilaat mittarfinni tamanullu angallassissutini qanermut assiaquteqarnermut peqqussutaapput.
Coronamut amerlanerusunik akiuussutissaliornikkut amerlanerusunillu pisiortornikkut taakkuninnga amerlanerusunik pissarsinissaq peqqussutini aamma ukkatarineqarpoq. Joe Bidenip præsidentitut atuuffeqarnerani ulluni 100-ni siullerni inuit 100 millionit akiuussuserneqarsimanissaat, Bidenip allattoqarfiata anguniagaralugu nalunaarutigaa.
AAMMA ATUARUK Joe Bidenip USA Parisimi isumaqatigiissummut WHO-mullu ilannguteqikkaa
Bidenip peqqussutit atsiunnginnerini, USA-p naalakkersuisuisa coronavirusip tuniluunnerata pakkersimaarnissaanut pilersaarusiaat saqqummiuppaa.
USA-mut angallannermut piumasaqaatit sukannernerulissasut, taanna saqqummiinermini oqarpoq. Tassa imaappoq, USA-mukartussat coronamut tunillanneqarsimannginnermut pinngitsooratik uppernarsaateqassapput. USA-mullu tikittut angerlarsimaannaqqusaasassallutik.
Angerlasimaannarnissaq USA-mut tikittunut Donald Trumpip præsidentiunerani piumasaqaatgaanngilaq.