Jette Larsen Hermann Berthelsenimut: A/S INI Nuummut nuunneqalinngilaq
Tamannali borgmesterip ersissutigisariaqanngikkaa, inissiaatileqatigiiffiup siulersuisuisa siulittaasuata, Jette Larsenip erseqqissarpaa.
Inissiaatileqatigiiffiup A/S INI-p siulittaasuata, Jette Larsenip siullermik erseqqissarpaa, inissiaatileqatigiiffiup qullersaqarfia Nuummut nuunneqassanngimmat.
- Inissiaatileqatigiiffimmi A/S INI-mi sulisut Nunarput tamakkerlugu 150-it missaanniipput, taakku akornanni sulisut 50-it Sisimiuniillutik. Taakku Nuummut nuunneqarnissaat eqqarsaatigineqanngilaq tassami qullersaqarfik Nuummut nuunneqartussaanngimmat.
Aamma atuaruk INI-p Nuummut nuunneqarnissaa borgmesterip paasiuminaatsippaa
Jette Larsenip aamma erseqqissarpaa, inissiaatileqatigiiffiup pisortaanissaata Nuummi allaffeqalernissaanut pilersaaruteqarnermi aningaasanik sipaarniarnermik tamanna toqaammaveqanngimmat.
- Suliassat annertunerpaat Nuummi ingerlanneqartarmata pisortaanerusussanngortup Nuummiinnissaa siulersuisunit piumasaqaatigaarput, Jette Larsen oqarpoq.
Tamannalu Qeqqata Kommuniani borgmesterimut ilisimatitsissutigereersimallugu, Jette Larsenip naqissuserpaa imalu nangilluni oqarluni.
- Inissiaatileqatigiiffik A/S INI piffissami kingullermi allanngortikkiartuaartinneqarpoq. Tamannalu pissutiogalugu, Sisimiuni atorfiit nutaat pingasut pilersinneqarput. Tassa imaanngilaq Sisimuniit Nuummut nuutiterisugut. Aaqqissuusseqqippugut taamaattumik A/S INI-p allanngortiternera iluamik angussagutsigu tamanna pisariaqarpoq.
Inissiaatileqatigiiffiup A/S INI-p siulittaasua, Jette Larsen oqarpoq.