Jesusimilluunniit angutitaqanngitsumik inunngortitaaneruvunga
- Eqqaaginnarlugu kissaammernartorujussuuvoq, ilami inatsisitigut ataataqanngilagut! Tupinnaqaaq inuit aaalajangersinaasimammata oqarlutik kalaallit uersakkat danskinik ataatallit tassaapput inuit ataataqanngitsut. Eqqarsaatigillualaaraanni Jesusimilluunniit "jomfrufødseliuneruvugut - angutitaqanngitsumik inunngortitat, oqarpoq.
Stina Sørensen Qaqortumi 1962-imi inunngorpoq arfinilinnik ukioqarluni ataatassaqalernissami tungaanut anaanani kisimeeqatigalu. Ataatavini qallunaajusoq pisortanut saaffiginnilluni ukiorpassuarni ujartarsimagaluarpaa, suli iluatsinngitsumik.
- Meeraavunga aappalaajusattorsuarnik nujalik, milaararpassualik, iserujussualik taamaammallu meeqqanit kalaaliaqqanit isikkora allaaneruvoq. Takuneqarsinnaajuaannarpoq akusaasunga. Tarrarsuutikkut qiviaraangama anaanannut assingunnginnera qalipaatikkut takusinnaasarpara. Naluarali kiminngaanneernersoq, ataatavigami ujarsinnaanngilara inatsisitigut mattussaanikuugama, Stina Sørensen oqarpoq.
Pingasunik meeraqarami eqqarsaatigisaannarpaa kingornuttakkamik danskit ilaquttani nappaateqarsimappata misissorsinnaannginnera.
- Paasiniarsinnaanngilaraluunniit inatsisitigut matoqqagami, oqarpoq.
Meeqqat pisinnaatitaaffii pillugit folketingip 1962-imi inatsit kalaallinut tunngasoq akueraa, taannalu malillugu kalaallit meerartaasa qallunaamik ataatallit Nunatta Kitaani 1963-imi kingornagullu aamma Nunatta Avannaani Tunumilu 1974-imi kingornagullu inunngortut angajoqqaatik katissimanngippata ataatartik qallunaaq ataataviginerlugu eqqartuussivitsigut - soorlu aassiuereernikkut - aalajangersartissinnaalerpaat. Tamannali tassa Kitaani juunip aallaaqqaataa 1963 sioqqullugu aamma Avannaani Tunumilu juulip aallaqqaataa 1974 sioqqullugu inunngorsimasunut atuutinngilaq. Aamma Stina Sørensenimut, 1962-imimi inunngorpoq.
- Misigisimasarpunga uanga kanngunartuliaallunga, uffa inuullunga immaqa danskit ilaqutariit tulluusimaarutigisinnaasaat. Ataataga ukiuni 18-ini uannut anaanannullu akilersuisimavoq - soqutiginnginnaminga?, aperaaq.
Stina Sørensenip kissaatigeqaa kalaallit qallunaamik ataatallit ataatassarsiornissamut pisinnaatitaaffeqalissasut.
- Inuusuttuaraallunga Danmarkimiillunga sumut arlaannut ingeriarlunga qallunaat angutit sanioqquttut isiginnaaqattaartapakka eqqarsarlunga: -Aajinnga ataataga. Innga imaluunniit innga. Naaj, narrugilertarpakka isiginnaaginnarlugit. Kisianni misigissuseq taanna ulloq manna tikillugu nueriataartarpoq, nassuiaavoq.
Stina Sørensen kommunimut, Rigsombudeqarfimmut eqqartuussivinnullu pappialanik paasissutissanik piniartaraluarpoq, kisianni tunniussisinnaasanngillat.
Angunni nassaarerusungaaramiuk aamma DR-ip TV-kkut aallakaatittagaanut Sporløs-imut saaffiginnissimagaluarpoq, akineqaranili. Taamaammat ujarlerunnaaginnarpoq.
- Ataatama assinnguanilluunniit takusuugaluaruma qamuuna eqqissiallassaluarpunga, kisianni ataatama inuuialuunniit piginngilara. Pigisinnaanngilara. Kiap ikiussagaminga ujaasinissannut, Stina Sørensen oqarpoq.
Folketingip inatsisaa Kalaallit Nunaanni meeqqat katissimanngitsunik angajoqqaallit pisinnaatitaaffiinut tunngasoq kingornussisinnaassutsimik killiliivoq. Ataataviusoq eqqartuussivitsigut kinaasoq aalajangerneqarsimanngippat meeraa kalaaleq kingornussisinnaanngilaq. Inatsit pineqartoq nr. 197 16. juni 1962-imeersoq, inatsisit Kalaallit Nunaannut innuttaanullu tunngasut allarpassuit assigalugit nittartakkami nassaassaanngilaq.
Sammisarput "Ataataga kinaava? nangillugu Inatsisinik atortitsinermut ministereqarfiup Ilaqutariinnut Qullersaqarfianit oqaaseqartitsissaagut. Isummersorusukkuit nittartagarput knr.gl aqqutigalugu aamma illit allagaqarsinnaavutit.
