Jess Svane: Atorfilittat politikkimut akuliutissanngillat

Borgmesteri taama qisuariarpoq, kommunalbestyrelsemi ilaasortap Ane Lone Baggerip, Demokraatineersup, atorfilittat politikkikkut oqallinnermut akuliunnerarlugit pisuutereeraalu.

- Taama paasineqarsimappat tamanna ajuusaarnarpoq, Jess Svane taama oqarpoq

Qaasuitsup Kommuniata pisortaa, Henrik Rafn, kommunemi qullersaqarfiup allaaserisaanut akisussaagaluarluni, Ane Lone Baggerip isornartorsiutaanut qanoq iliuuseqarusunngilaq.

Ane Lone Baggeri Qaasuitsup Kommuniani illuatungiliuttunut ilaavoq. Ataasinngormat radioaviisimit apersorneqarluni kommunimi atorfilittat periusaat kamaatigaa.

Nukissiorfiit akinik qaffaaniarneranut siunnersuummut kommunemi atorfilittat kommunalbestyrelsemut akuerisassatut innersuussuteqarput. Innersuussut taanna ima nipeqarpoq:

"...nunaqarfinni innaallagissap akiata aningaasartuutinut naapertuuttunngortinnissaa kissaatigineqarpat, minnerpaamik illoqarfinni akit appariartinneqarnissaat tunuartinneqartariaqaraluarpoq, iluanaarutaasorlu nunaqarfinni akit qaffariarnerata millisinnissaanut atorlugu."

Taamatut innersuussisimaneq politikkikkut oqariartornerunngitsoq borgmesterip oqaatigaa, imali oqarluni:

- Qaasuitsup Kommuniani ileqqorissaarnissamik pingaartitsisuuvugut, issuakkatit qulaaniittut peerneqareerput. Soorunami atorfilittagut politikkissanngillat politikkertussat tassaapput politikerit.

Politikerinik immikkoortitsisoqaranilu qinersisartut qinigaannik atorfilittat sullissisussaapput, taama naqissusiivoq Jess Svane. Aamma naqissuserpaa, atorfilittat politikkikkut arlaannaannulluunniit qilersorsimassanngimmata.

- Uanga pisussaaffigaara qinikkanik partiini sorlerniikkaluarpataluunniit assigiimmik sullississallunga. Atorfilittat qinikkanut assigiimmik sullissisussaapput aammalu politikkikkut qilersorsimassanatik, pisussaaffigaat politkerit kikkulluunniit assigiimmik sullisissallugit. Jess Svane naggasiivoq.