Jess G. Berthelsen: Akissarsiaqqortunerulerneq aqqutissaavoq

- Sulisartut naammaginartumik inuuneqassagunik atugarisamikkullu toqqissisimassagunik, nunami innuttaasunut tamanut atuuttumik naligiiffiusariaqarpoq, SIK-p siulittaasua oqarpoq. Taassumalu naatsorsuutigilluinnarpaa, akileraartarnikkut, atugarissaarnikkut, pisuussutitigut uumaatsutigut, aalisarnikkut, ineqarnikkut, meeqqanut inuusuttunullu tunngasutigut, ilinniartitaanikkullu aaqqissuusseqqinnissat nunaqavissunut tamanut atuukkumaartut.

- Taamaattumik tupigusuutiginngitsuunngilara Demokraatit siulittaasuata, Jens B. Frederiksenip ukiortaami oqaaseqaatimini erseqqissarmagu, Naalakkersuisooqatigiit atuuttut naalakkersuisuutillugit nunami maani isertitatigut akileraarusersueriaaseq allanngortinneqassanngitsoq, Jess G. Berthelsen oqarpoq, nanguillunilu:

- Kialluunniimmi nalunngilaa Nunatsinni innuttaasut pigissaartunut pissakilliortunullu immikkoortinneqartarmata, nuimanerit atugassaqarluarlutik, soorlu illunut millionilikkaanik akilinnut, kalaallip sulinermik inuussutissarsiuteqartup palliimisinnaanngisaanulluunniit, Jess G. Berthelsen oqarpoq naggasiillunilu:

- Taamaakkaluartoq, qanorluunniit ilioraluarutta, piviusuuvoq kalaaleq sulinermik inuussutissarsiuteqartoq tassaasoq, pisuussutinik uumaatsunik, ilimagineqartutut iluaquteqarnialerumaarnitsinni tunngaviusussaq, taamalu Nunatta namminersulivinnissaanut aqqutissiuussisussaq. Ukiortaami oqaaseqaatini Jess G. Berthelsenip taama naggaserpaa.