Jess annilaartitaasoq
- Naalakkersuisut siulittaasuata ukiortaami oqalugiaataa ataatsimut isigalugu pitsaasoq siammasissutullu oqaatigineqartariaqarpoq, kisianni oqaatsit timitalerneqanngippata sumut iluaqutaava, SIK-p siulittaasua Jess G. Berthelsen aperaaq?
Kuupik Kleistip oqalugiaammini ilaatigut oqariartuutigaa, nunatsinni naligiinnginnerup annikillisinneqarnissaa, Naalakkersuisut ukiumi 2012-imi sulissutigissallugu siuunniukkaat.
- SIK-mi ernummatigaarput, sinerissami ilaasortatta atugaat suli assigiinnginnerulissasut. Aamma ernummatigaarput taamatut orsussat imerpalasut akiinik assiigiititsiunnaarnerup kingunerissagaa, illoqarfinni nunaqafinnilu atukkat assigiinnginnerulernerat, Jess G. Berthelsen aallappoq.
SIK-p erngummatigaa, ikummatissat imerpalasut akii assigiittussaajunnaarpata, assersuutigalugu nunaqarfinni unammilerfiunngitsunilu allani, ikummatissat akii illoqarfinni anginerusunik akiniit qaffasinnerulissasut, nioqqutissat akitsorneranik kinguneqartumik.
Taamaammat ikummatissat imerpalasut assigiimmik akeqartussaatitaanerisa taamaatinniarneqarnera unitseqqullugu, SIK-p ilungersorluni inassutigaa.
