Jens Werner Vild med dansimi aalajangiisartuusimasoq toqusoq
Qitittartoq "Vild med dans"-imilu aalajangiisartuusimasoq, Jens Werner kræftimik sivisuumik napparsimareerluni qimaguppoq, taassuma ilaqutai Ritzau-imut mailikkut paasissutissiipput. Jens Werner 59-inik ukioqarpoq.
Taanna Danmarkimi "Vild med dans"-ip ukiuni aallakaatinneqarfigisimasaani tamani aallakaatitsinerni 20-ni aalajangiisartuuvoq.
Jens Werner juulip qulingiluaani anerningertoq mailimi allassimavoq.
- Jens asseqanngitsumik timersortartuuinnaranilu, naliliisartuuinnaranilu, ilinniartitsisuuinnaranilu oqalugiartuinnaanngilaq, aammali uiuvoq, ataataavoq, erneruvoq qatanngutaavoq ningaajuvoq angaajuvoq asanneqalunilu isumassuilluinnartoq, ilaqutaasut mailimi allapput.
Nunatsinnit pingasunik peqataasoqarnikuusoq
Jens Wernerip nuliani Anette Werner meeqqatillu marluk qimappai.
Taanna Danmarkip oqaluttuarisaanerani Danmarkimi nunanilu allani qitinnerni ajugaanerpaasimavoq, ilaatigullu 1994-imi assuarluni qitinnermi nunarsuarmi pissartanngornikuulluni.
Werner kræfteqarluni paasineqarsimasoq 2023-mi upernaakkut paasissutissiivoq. Taassumali "Vild med dans"-imi aalajangiisartuunini 2023-mi novembarimi naasussaq ingerlatiinnarpaa.
Nukâka Coster-Waldau Vild med Dans-imi 2020-mi peqataasoq, 3-nngorlunilu. Laila Friis-Salling 2018-imi peqataavoq Julie Berthelsenilu 2016-imi peqataalluni.
