Jens Napãtôq qaammatini sisamani parnaarussaalerpoq

Ineqarnermut angallannermullu naalakkersuisuusimasup Jens Napaattuup pillagaanini marlunngormat Frederikshavnimi aallartippaa.
Allattoq Bikki P. Kleist
januaarip 13-at 2010 04:24

Jens Napãtôq Danmarkimi Kragskovhedemi parnaarussivimmut marlunngormat nalunaaqutaq marluk qaangerlugit tanneq marlunngortoq qaammatini sisamani parnaarussaajartorluni iserpoq. Sermitsiaq.AG taama allappoq.

– Nammineerlunga Kalaallit Nunaanni politimesteri qinnuteqarfigaara pineqaatissinneqarnera piaarnerpaamik naammassiniarlugu. Parnaarussaanissara sivisussaqaaq tamaviaarnassallunilu, ersissutigaara eqqartuussutip inuuneq naallugu atuunnissaa, qaangiunnissaali inuuninnillu ingerlatseqqilernissara qilanaaraara, Jens Napãtôq oqarpoq.

Suliaq 2005-imi aallartinneqarpoq. Jens Napãtôq naalakkersuisunut ilaasortaanermi nalaani ilassinnissutinik 128.000 koruunit tungaannut atornerluisimasutut taamanikkut unnerluutigineqarpoq.

Jens Napãtôq qaammatini sisamani pinerluuteqarsimasunut inissiisarfimmiittussatut Kalaallit Nunaanni eqqartuussiveqarfimmit pineqaatissinneqarpoq. Pineqaatissiinerlu Østre Landsretimut 2009-imi ingerlateqqikkaluarpaa pineqaatissiissulli qaammatini sisamani sivisussuseqartussq aalajangiusimaneqarmat, maanna Jens Napãtôq Frederikshavnimi qaammatini sisamani parnaarussivimmiilerpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq