Jens Napãtôk Inatsisartunit sulinngiffeqarumasoq

Naleqqamit Jens Napãtôk' Aningaasaqarnermut Akileraartarnermullu ataatsimiititaliamut siulittaasussatut ullumi toqqarneqarpoq

Jens Napãtôrli Inatsisartut ataatsimiittarfianniinngilaq - taanna angerlarsimavoq, napparsimasutullu nalunaaqqalluni, taannalu maanna sulinngiffeqarnissamik qinnuteqarpoq.

Jens Napãtôk'-p nuliatalu angerlarsimaffianni pissutsinik video takutitsisoq - Facebookikkut siammarterneqartoq pissutaavoq.

Videoliami inuit pingasut inimiittut takutinneqarpoq. Taakkunannga marluk tassaapput Jens Napaattooq taassumalu inooqataa. Napaattuup inooqataa natermi nalavoq, Napaattuullu sequtserniarlugu siorasaarpaa.

Angerlarsimaffimmilu ajornartorsiutit aamma pissutigalugit Jens Napãtôk' Inatsisartunit sulinngiffeqarnissaminik maanna qinnuteqarluni, Facebookikkut allappoq.

- Aappannguara tapersersorumallugu ilaqutariittullu suliassagut meerannguagullu tamattaalluta aqqusaagaqarnikooqigatta, maannalu puttallartup kinguneranik kiisami katsorsartinnissarput meerannguagullu angusussanngoratsigu ilaqutariittut oqiliallaatigeqaara, Jens Napaattooq allappoq.

- Ilaqutakkalu salliutillugit inatsisartuniit sygmelderlunga qinnuteqaateqarama nalunaaruteqarpunga.

Napãtôk nammineq oqarpoq: Nakuusinngilanga

Naleqqamit politikeri KNR-imut ima oqarpoq:

- Tassa nammineq inuunitsinnut tunngaveqarpoq. Tassa ajornartorsiuteqarneq pissutigalugu.

Arlaat arlaannut nakuusernernikuua?

- Uanga tunginniit taamaattoqanngilaq, soorunami arv arv ingerlaqattaarput, taava qullermik anaaseriarnermini qulliup aserornerani kimillannerani kiinaani tassa kiinnami aanaartoornera uanga profilinnut ikkussimavaa.

AAMMA ATUARUK Siumukkormiut Inatsisartut ataatsimiittarfiannit aneriasaartut

- Tassa eqqissiviilliorneq sivisulaartumik ingerlavoq. Aamma politiit akulerunnikuugaluarpakka aamma taakku takkunnikuugaluarpout. Aamma toqqissisimassasut neriorsuutigineqarmat, meeraq toqqissisimassammat ingerlaqqipput, Jens Napãtôq KNR-imut oqarpoq.

- Aamma immiaaqqat imerneqannginniassammata nassuiaatigivaa kamaatigineqaqisut aserorterakkit uanga altaniminngaaniit, imertoqannginniassammat.

Illit aamma aalakoorpit?

- Illoqarfimmiikkata aamma uanga malussataarpunga.

- Aapparma imigassamut katsorsartinnissaa tapersersorlugu, aamma meeqqagut, oqarnertuut aatsaat una aqqusaalinnginnatsigu taamaattumik kaammattuutigaara familiebehandlingimut ilaassasugut. Ataatsimut ilaqutariit isigaluta alloriarnissatsinnut aqqutissiuimmat una alianaraluaqisoq soorlulusooq uannut aamma oqilinaqaaq.

Aappaasoq: Unatarneqanngilanga

KNR-ip  Jens Napãtôp aappaa attaveqarfigaa. Taanna apersorneqarusunngilaq, allallunili akissuteqarpoq:

- Kiinakkut kimillassimallunga aanaartoq asseq ikkussaq aapparma statusiani pivoq qullermik igalaaminermik skærmitalimmik kamallunga aanaariarneranik aserornerani tammiffigitikkama assiusoq uanga nammineq kamallunga ikkutaraara.

- Imaanngilaq annersagaasimallunga nivingaaniaraluartunut aallaaveqartoq.

Inatsisartut ataatsimiittarfiat pisoqarfiusoq

Jens Napãtôq pillugu suliaq Siumut Demokraatillu Inatsisartunit ullumi aniinnarnerannik kinguneqarpoq. Tamanna Inatsisartut siulittaasuata, Hans Enoksenip aningaasaqarnermut akileraartarnermullu ataatsimiititaliami ilaasortassat aqqinik atuaanerata kingunitsianngua pivoq. Jens Napãtôq ataatsimiiititaliamut tassunga siulittaasunngorpoq.

Jens Napãtôq Inatsisartunut qinersisoqarnerani 324-nik taaguunneqarpoq. Taannalu Avannaata Kommunianut kommunalbestyrelsimut aamma qinigaalluni. Tassani 213-init taaguuneqarpoq.