Jens Immanuelsen: Qaleralittassat naammattorsuupput

Halibut Greenland A/S-ip siulersuisuini ilaasortap Jens Immanuelsenip, Upernavik Seafood A/S-imi siulittaasoq Lars-Emil Johansen ippassaq unnukkut radioaviisimi eqqunngitsunik oqaaseqarsoraa, sakkortuumillu uparuarlugu.
Allattoq Janus Maqé
juulip 08-at 2009 16:49

- Lars-Emil Johansenip ippassaq oqaasii tamarmik eqqunngillat, sakkornerpaamillu utertittariaqarlutik.

Halibut Greenland A/S aalisartunit kalaaliusunit 34-nit piginneqatigiinnikkut pigineqarpoq. Umiarsuaq tunitsivik attartorpaat qalerallit 1000 tonsit naalakkersuisunit akuerineqartut aasap ingerlanerani tunisassiariniarlugit.

Umiarsuarmi tunitsivimmissaaq Rubinimi russinik inuttaqarneq kukkusumik Lars-Emil Johansenimit saqqummiunneqarnerarpaa:

- Umiarsuup naalagaa inuttallu tallimat russiupput, sinneri 18-it aquttoq aquttorlu minneq kalaaliupput, tamarmik Qaasuitsup Kommunianut akileraartussaatitaasut.

Aamma naligiinngitsumik unammillertoqarneranik oqarneq ilumuunnginnerarpaa, oqarluni qalerallit ulloq unnuarlu tunisassiarineqarput allaammi papeqqut tunisassiarineqartut, tunisassiorneq ingerlarsorfiuvoq.

Taamaattumik Upernavik Seafood matoqqatitsinera aalisartunut mitallerneruvoq, Jens Immanuelsen oqarpoq.

Jens Immanuelsen aamma isumaqarpoq naammattorsuarnik qaleralittassaqartoqarmat, Upernavik Seafoodip matoqqatitsinera tunngavissaqanngitsoq - akuerineqarsinnaanngitsorlu.

- 2008-p naajartornerani pisassat 5000 tonsit 2009-mi 6000 tonsinut qaffanneqarput, taamaattumik Upernavik Seafood matoqqatitsissalluni tunngavissaqanngilaq, akuersaarneqarsinnaananilu, Jens Immanuelsen oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq