Danskit nunamut namminermut peqqinnissamullu ministereqarfiata arnat spiralilersorneqarsimasut tamarmik immikkut 300.000 koruuninik taarsiissuteqartoqarnissaanut qinnuteqarsinnaasut nunatta nalunaaqutaa naapertorlugu ullaap tungaani nalunaarutigaa.

Tusagaq naalakkersuisut siulittaasuannut, Jens-Frederik Nielsen (D), nuannersuuvoq, taassumalu taarsiissut arnat pineqartut ikiinut  mattutimininnguatut isigaa.

- Soorunami nuannaarutigaara. Alloriarneq eqqortuuvoq. Qangali suliaq aallartinnikuuvoq.

Taarsiissuteqartoqarnissaanut Naalakkersuisut politikkikkut piumasaqaateqarnerannit suliap maanna piviusunngortinneqartup ingerlanera qanoq oqaaseqarfigisinnaaviuk?

- Soorunami suliap ingerlanera eqqartortuarsinnaavarput. Aamma pitsaanerujuaannarsinnaavoq immaqa. Kisianni ullumi nuannaarutiga uaniippoq arnat ajoraluartumik kusananngitsumik eqqunngitsumillu pineqarnikut naartunaveersaaserneqarnikut taakku pitsaasumik ullumikkut alloriarfigineqalermata, Jens-Frederik Nielsen oqarpoq.

Jens-Frederik Nielsenip (D) Danmarkip arnanut spiralilersuisoqarnerani innarlerneqarsimasunut taarsiissuteqarnissaanut piffissanngorsoraa. Assi © : Pipaluk Høegh / KNR

Ministeriuneq, Mette Frederiksen taarsiissuteqartoqarnissaanut ullumikkut nutaarsiassarineqartumut allakkatigut akissuteqarpoq.

- Arnanut iliuuserineqarsimasut piffissami sivisuallaami isiginngitsuusaarsimavugut. Isiginngitsuusaarunnaarpagut. Pisimasut allanngortissinnaanngilagut. Kisianni akisussaaffimmik tigusisinnaavugut. Maannalu taamaaliorluta,

Nunatta Danmarkimut atassuteqarnera

Múte B. Egedep (IA) Danmark spiralilersuinermi suliami inuiannik nungusaasimanerarlugu siorna decembarimi oqaatigaa.

Taanna naalakkersuisunut suli siulittaasuunermini taama oqaaseqarpoq, tamannalu tamatuma kingorna nunatsinni Danmarkimilu qisuariarnernik pilersitsivoq.

Jens-Frederik Nielsen arnanut eqqugaasimasunut taarsiissuteqartoqarnissaanut nalunaarut nunat akornanni atassuteqaammut qanoq sunniuteqassanersoq aperineqarami ima akissuteqarpoq:

- Isumaqarpunga nunatta danskillu oqaluttuarisaaneq eqqunngitsorpassuarnik imaqartoq taanna suli qiviaqattaartussaagipput.  Nunatta Danmarkilu siornatigut pisimasut eqqarsaatigalugit misissuinerit allallu maannakkut ingerlapput suli. 

- Tassami maannakkut naartunaveersaaserneqarsimasut eqqarsaatigalugit alloriarneq pitsaasoq ingerlavoq. Kisianni oqaluttuarisaaneq qiviarutsigu suli allanik misissuinernik allanik misissuisoqarpoq. Taakku ataavartumik qiviarsinnaasariaqarpagut aamma ataavartumik malersussavagut, taanna oqarpoq.

Suliaq naammassisutut isigaajuk, imaluunniit naalakkersuisut piffissami qaninnerusumi malitseqartitsiniarpat?

- Tassami maannakkut naartunaveersaaserneqarsimasut eqqarsaatigalugit alloriarneq pitsaasoq ingerlavoq. 

- Kisianni oqaluttuarisaaneq qiviarutsigu misissuinernik allanik suli ingerlasoqarpoq. Taakkua ataavartumik qiviarsinnaasariaqarpagut, aamma ataavartumik malersussavagut.