Jens Erik: Tuluit oqaasii salliutissapput

Cairn Energy, ukiut siuliini nunatta imartaanik uuliamik ujarlernermini kalaallinik sulisussaaleqisartoq, taama piumasaqarpoq.

Tamannalu Naalakkersuisut paasilluarpaat.

Taamaammat tuluttut oqaatsit meeqqat atuarfianni saalliunneqartariaqarput, aatsitassarsiornermut naalakkersuisoq Jens Erik Kirkegaard isumaqarpoq.

- Arlaannik susoqassagaluarpat, sillimaniarnermut atortut oqaatsillu ingerlanneqartut tuluttuummata, taamaammat pingaaruteqarpoq tuluttut inuiaqatigiinni eqqartulaartariaqaripput, Jens Erik Kirkegaard taama oqarpoq.

Cairn Energy Nunatsinneersunik sulisussarsisinnaanngilaq, naak Nunatsinni ullumi suliffissaqanngitsut amerlagaluartut.

Cairn Energymi suliniarlutik qinnuteqartut tuluttut piginnaasakippallaartut, uuliasiortitseqatigiiffimmi pisortat ilaat Ian Watts, Sermitsiamut oqarpoq.

Taamaammat aatsitassariornermut naalakkersuisup ilaatigut meeqqat atuarfianni  tuluttut oqaatsit siusinnerusukkut ilinniartitsissutigineqarsinnaanerat, politikkerinit eqqarsaatigineqartariaqartoq isumaqarpoq.

- Tuluttut ilinniarneq kingusilaartukkut aallartittarami, soorlu qallunaatut kalaallisullu ilinniarnermut sanilliullugit. Immaqa eqqartorneqarsinnaavoq politikkikkut, taanna allanngortinneqassannginnersoq, imatut tuluttuut siusinnerusukkut aallartillugu, Jens Erik Kirkegaard taama oqarpoq.

Naalakkersuisut uuliasiornermut aatsitassarsiornermullu periuusissaannut siunnersuut tallimanngormat tusarniaasutigineqalerpoq.