Jens B: Upalungaarsimanerup attatiinnarnissaa ajornakusoorsinnaavoq

Immakkut angallannermi ajutoortoqartillugu annaassiniartoqartillugulu, Namminersorlutik Oqartussanit Naalagaaffimmut suut isumaqatigiissutaasimanersut, Kattusseqatigiit Partiiat sinnerlugu Inatsisartunut ilaasortap, Knud Fleischerip paragraf 37 aqqutigalugu apeqqutaa naalakkersuisup Jens B. Frederiksenip akissuteqarfigaa.

Jens B. Frederiksenip akissummini ilaatigut oqaatigaa, Nunatsinni sillimaniarneq eqqarsaatigalugu suleqatigiissitap sulilluni aallartereersimagaluartup sulinini siorna oktoberimi naammassisussaagaluarlugu unitsissimagaa, ilaatigut Danmarkimi folketingimut qinersineq pissutigalugu aammalu aningaasartuutit pillugit paasissutissanik pissarsiniarnermi siumut ilimagineqariinngitsunik ajornartoorneq pissutigalugu.

- Air Greenlandip qulimiguulinnik S61-inik atuiunnaariartornerata kinguneranik upalungaarsimanerup ullumikkutut ingerlatiinnarnissaa ajornakusuussasoq ilimanarpoq. Tamannalu tunngavigalugu Danmarki qinnuigaarput, qulimiguulinnik atorunnaarsitsiartortoqarnerata sunniutigisinnaasaanik misissueqqissaarnissamik siunertaqartumut ilaaleqqullugu, Jens B. Frederiksen akissummini allappoq.

Aningaasartuutaasimasunut apeqqummi akissuteqarluni, Jens B. Frederiksen ima allappoq:

- Isumaqatigiissuteqarnerup kingunerisaanik 2001-imi akit malillugit 9,3 millionit koruunit isumaqatigiissutigineqartut 75 procentinik Danmark akiliisussaavoq. Taamanikkut 7 millionit loruunit missaannik amerlassuseqarput - tassalu aningaasat ullumikkut 8 millionit koruunerpianut amerlisimapput. Jens B. Fredriksen allappoq nangillunilu:

- Namminersorlutik Oqartussat Air Greenlandimut isumaqatigiissutigisaannut, 2011-miit 2012-imut atuuttussamut akiligassat 14,5 millionit koruunit missaanniittut ilaapput, Jens B. Fredriksen allappoq.

Taamaalilluni Namminersorlutik Oqartussat isumaqatigiissutaasut 25 procentimik sinnerlugit akilertarlugit.