Jens B. qullersatut atorfeqalersoq
Frederiksenip politikeritut sulineranut tamanna qanoq sunniuteqassanersoq ilisimaneqanngilaq, aamma Jens B. Demokraatinilu siulittaasup tullia Anda Uldum, naalakkersuisuusimasup politikkikkut siunissaa pillugu oqaaseqartinniaraluaratsigit pissarsiarisinnaasimanngilagut. Jens B.-p politikkimik suliaqarnini unitsissappagu Demokraatit annertuumik eqqugaasussaassapput, partiimmi ilaasortaasa nuimanerit ilaat, Palle Christiansen, siorna Danmarkimut aamma nuussimammat.
Frederiksenip Demokraatit siulersuisuunerini ilaasortaasimasoq Bent Olsvig Jensen, maanna True North Gems Greenlandimi managing directoriusoq suleqatigeqqilissavaa, Olsvig Jensenillu Jens B. Frederiksenip suliffeqarfimmi suleqatigilernera nuannaarutigaa.
-Jens B. Frederiksenip True North Gems Greenlandimi sulilernissaminik akuersisimanera nuannaarutigisupilussuuarput. Misilittagai piginnaasaalu siunissami tunisassiornissamut piareersarnitsinnut iluaqutigilluarsinnaavagut, Bent Olsvig Jensen Canadian Mining Journalimut oqarpoq.
