Jens B: Ove Karl arriippallaamik sulisimavoq

Taama isumaqarpoq, Demokraatit siulittaasuat, Jens B. Frederiksen. Taanna Naalakkersuisooqatigiinnermi peqataanini naapertorlugu, Qoornumi isumaqatigiissummut aamma atsioqataavoq, kisiannili tassa maanna pisimasumut isornartorsiuilluni.

Jens B. Frederiksen ullumikkut isumaqarpoq, uranitalinnik piiaanngilluinnarnerup atorunnaarsinneqarnissaa kinguartinneqartariaqartoq, urani pillugu ilisimasat annikippallaarneri pissutigalugit.

- Aatsitassanut Naalakkersuisuusimasup, Ove Karl Berthelsenip suliaq pimoorunnerusimagaluarpagu, uranimut naaggaarluinnarnerup atorunnaarsinneqarnissaanut aalajangiinissamut ullumikkut piareersimanerusimassagaluarpugut aamma paasissutissat tamaasa pigilereersimassagaluarpagut, Jens B. Fredriksen isornartorsiuivoq.

Taanna Naalakkersuisooqatigiinnermi pingaaruteqarluartuulluni inissisimavoq, taamaattumillu suleqatiminut Inuit Ataqatigiinnut isornartorsiuinissani salliussimanagu.

- Taamani 2009-mi Qoornumi Isumaqatigiissut atsiorlugu suleqatigiinnissamik isumaqatigiippugut. Demokraatiniillu taamanikkulli kissaatigigaluarparput apeqqut suli pimoorunneqarnerulluni suliarineqartariaqartoq. Taamaakkaluartoq maanna oqaqqittariaqarpunga, paasissutissat maanna suli amigarput aalajangiinissatsinnut, Jens B. Fredriksen oqarpoq.

Naalakkersuisuusimasut siulittaasuata, Kuupik V. Kleistip tupiginngilaa Demokraatit suleqatigisimasaminnut maanna qinngasaarisutut pissusilersormata.

- Isumatiginngilara kisianni paasilluarsinnaavara, tassami Demokraatit tunngaviatigut isumaqatigaat, qinngornernik ulorianartunik piiaasinnaanissaq taamanili isumaqatigimmassuk.

Kuupik V. Kleist oqarpoq, maannali isornartorsiuineq tunngavissaqannginnerarlugu oqaatigalugu. Kuupik V. Kleist ima nangippoq.

- Imaanngilaq ullormiit ullormut imaluunniit eqqoriakkat misigissutsillu tunngavigalugit aalajangiisoqarsinnaasoq, aatsaat tutsuiginartumik ilisimasaqalernikkut aamma oqaloqatigiilluarnikkut aalajangiinerit taamaattut qanillattorneqarsinnaapput, taamaammat piffissaq pisariaqartinneqartoq atorlugu sulisimavugut.

Naalakkersuisut siulittaasorisimasaat, Inuit Ataqatigiit siulittaasuat, Kuupik V. Kleist oqarpoq.