Jens B.: Naalakkersuisut siulittaasuat qanoq isumaqarpa?
Partii Inuit siulittaasuata tulliata Randi Brobergip tusagassiorfinnut nalunaarummi quppernernik arlalinnik takitigisumi Partii Inuit Nikku Olsenimik tamakkiisumik tapersersuinera naqissuserpaa sunarpiarlu pissutigalugu Inatsisartunut ilaasortaasinnaanngitsutut aalajangiiffigineqarneranik misissuisoqarnissaa piumasaralugu. Paasissutissat saqqummiunneqartut kingullit eqqarsaatigissagaanni Nikku Olsenimik tapersersornera arnanik persuttaasarnermik akuersaarnertut aamma paasineqarsinnaavoq.
-Partiimik arnanik persuttaasarnerup ajoqutissartaqannginneranik isumaqartumik suleqateqarsinnaanerminut Aleqa Hammond qanoq nassuiaateqassanersoq tusaassallugu qilanaarivara. Siulittaasumut Nikku Olsenimut tapersiinerat allatut isigineqarsinnaanngilaq, aamma partiimik taamatut ittunik isummersorsinnaasumik naalakkersuisooqateqartoqarsinnaanera paasiuminaatsittupilussuuara. Arnanik persuttaasarneq akuersaarneqarsinnaanngilluinnarpoq, Demokraatit siulittaasuat Jens B. Frederiksen naqissusiilluni knr.gl-imut oqarpoq.
Nikku Olsenip siuttorineqarsimanngitsuuppat Partii Inuit Inatsisartunut ilumut isertitaqarsimassanersoq aamma apeqquserneqarsinnaavoq. Partiimut taasinerit quliugaangata arfinillit Nikku Olsenimik taasinerupput. Taamaammat partiip iluatsitsilluariasaaneranut Nikku Olsen pissutaalluinnartutut oqaatigissallugu kukkunerunngilaq. Aamma paasinarsivoq politikeritut qinikkatut sulinissamut tulluanngitsumik iliuuseqartarsimanini ilimareersimagaa. Taamaakkaluartorli marsip 12-iani qinersinissamut partiini sinnerlugu qinigassanngortippoq.
-Nikku Olsenip iliuuserisimasani suunngitsutut isigisimanngitsuuppagit qinersisartunullu isertuussisimanngitsuuppat naalakkersuinikkut pissutsit allartorluinnaq isikkoqarsimassagaluartut maanna erserpoq. Partii Inuit qinersinermi taama angusarissaartigisimanngitsuuppat aamma ilaasortanngortut agguataarneqarsimaneri allaanerujussuusimassagaluarpoq, immaqalu aamma qinersinerup kingorna Naalakkersuisunngortut allaanerusimassagaluarlutik. Qinersiserpassui IA-meersuupput, naalakkersuisooqatigiissimasullu ilaasortaatitassamik ataasiinnarmik isertitaqarsimasuuppata Atassut peqatigalugu amerlanerussuteqarsimassagaluarput. Tamat oqartussaaqataanerannut kusanaatsuliorneruvoq ingasattupilussuaq, Jens B. Frederiksen isumaqarpoq.
