Jens B: Kikkut tamarmik eqqugaapput
Orsussat akiinik qaffaaneq inuiaqatigiinnut annertuumik eqquisussaasoq, naalakkersuisup Jens B. Frederiksenip naqissuserpaa.
Orsussap akii tallimanngormat annertuumik qaffariasaarput, benzina dieselilu literimut 5 koruunit 57 ørenngorput qaffariaat 1 koruunit 10 øreulluni. Qaffaanerlu tamanut annertuumik eqquisussaasoq, politikkikkut akisussaasoq Ineqarnermut, Attaveqarnermut Angallannermullu Naalakkersuisoq Jens Blidorf Frederiksen oqarpoq:
- Tamatta ugguarisinnaavarput taamak annertutigisumik qaffammat, soorunami assigiinngitsutigut sunniuteqassaaq. Piniartunut Air Greenlandimullu kisimi attuumassuteqanngilaq inuussutissarsiornermulli suliaqartunut tamanut sunniuteqassalluni.
Aamma innaallagissamut akit qaffannissaat ilimanarsinnaasoq, Jens B. Frederiksenip oqaatigaa.
Qaffaanermut eqqugaasussaq siullermik tassaavoq Air Greenland, nunatsinnilu timmisartuussinermi billetsit qaffanneqarnissaat pisortap Michael Binzerip aalajangiutereerpa.
Taxaatillit, umiatsiamik angallatsitsisartut aalisartut piniartullu qaffaanermut eqqugaasunut ilaapput.
KNAPK-llu orsussamut tapiissuteqartoqartalernissaa qinnutigereerpaa:
- Avammut niuernermi isaatitsiffiit annersaraat aalisarneq, taamaattumik inuiaqatigiit soqutigisariaqarpaat avammut niuernermi pilersitsisuusut ajunnginnerusumik atugassaqarnissaat, KNAPK-mi siulittaasup tullia Isak Vahl oqarpoq, naqissuserlugulu nunatsinni avammut tunisassiornermi aalisakkat tunisaanerpaajusut, taamaattoq aalisartut tapiiffigineqarnissaanut pisariaqarluinnartoq.
Orsussap akiisa 20 procenti sinnerlugu qaffariarnata kinguneranik aningaasarliortoqarnerulernissaa Jeremias Jensenip, KNAPK-mut ilaasortaasut Ilulissani Raajarniaat Peqatigiiffianni siulittaasuusup, ernumagaa.
- Akuersaarsinnaanngilluinnarpara, uagut raajarniutaateqartuusugut 1900-kkunni 11 koruuni angungatsigu nuannaaqaluta aalisarpugut, kisianni massakkut solarip akitsornera nammassinnaanngivissorparput, Jeremias Jensen oqarpoq.
Tapiissuteqalernavianngitsorli, politikkikkut akisussaasoq oqarpoq:
- Aalisartut piniartullu kisimik pineqanngillat, kikkut tamarmik eqqugaapput. Aamma nunarsuarmioqativut tamarmik eqqugaapput, nunarsuarmi akit uani pineqarmata,Jens B. Frederiksen oqarpoq.
