Jens B: Isornartorsiuineq naalaarparput - inatsisinilli unioqqutitsisoqanngilaq

Ineqarnermut Naalakkersuisoq Jens B. Frederiksen ima oqarpoq:

- Ineqarnermut akiliutinik qaffaanissaq tungitsinninngaanniit pingaarnersaanngilaq, oqummilli akiuinissaq pingaarnersaalluni. Qaffaaniarnermillu politikkikkut uparuaasut arlaqartut maanna paasinarsivoq, taamaammat allatut periarfissarsiornialerpugut, Ineqarnermut Naalakkersuisoq Jens B. Frederiksen oqarpoq.

Siumup inatsisartunut ilaasortaatitaa Malik Berthelsen aamma Inuit Ataqatigiit sinnerlugit inatsisartunut ilaasortaq Hans Aronsen qaffaaniarnermut tunuliaqutaasut isornartorsiornikuuaat.

Inatsisartut inatsisinut ataatsimiititaliaata siulittaasua Isak Hammond aamma inatsisileritooq Lissi Olsen isornartorsiuisunut aamma ilaapput.
Lissi Olsenip ilaatigut oqaatigaa inatsisit unioqqutinneqassasut ineqarnermut akit qaffanneqarpata.

Ineqarnermut akit aappaagu maajip aallaqqaataaniit qaffanneqartussaagaluarput, Namminersorlutik Oqartussat inissiaanni akiliutigineqartartut 500 koruuninik qaffanneqarlutik, Namminersorlutillu Oqartussat illuinik attartornermi akiliutigineqartartut 1000-it koruuninik qaffanneqartussaagaluarlutik.

Ineqarnermut tunngasut Nunatsinnit 1980-ikkunni akisussaaffigineqalerpoq:
- Ineqarnermulli akiliutit appasitsinneqartut iliuuseqarfiginissaanut politikkikkut qunusuissutsip pisariaqartinneqartup amigaataanera malunnarsimavoq, Naalakkersuisut allapput, aningaasallu aserfallatsaaliuinissamut oqummillu akiuiniarnissamut atugassat allatigut nassaariniarneqalerput:

- Siunissaq ungasinnerusoq eqqarsaatigalugu pingaaruteqarluinnarpoq uuma eqqartorneqarnissaa. Oqummik akiuiniarneq pillugu allatut ujartuilerpugut, kisianni siunissaq ungasinnerusoq eqqarsaatigalugu oqallittoqartariaqarpoq. Taamaaliunngikkutta ajornartorsiutit aaqqiivigineqarnavianngillat, meeqqavullu siunissami ajornerusunik inissaqalertussaallutik, Ineqarnermut Naalakkersuisoq Jens B. Frederiksen oqarpoq.

Taassuma erseqqissaatigaa ineqarnermut akiliutigineqartartunik qaffaaniarnerigaluaq inatsisinik unioqqutitsinerunngitsoq.
Akileraartarnermut Atugarissaarnermullu ataatsimiititaliap ineqarnermut akiliutit ullumikkornit qaffasinnerungaatsiarnissaat inassuteqaatigaa, tamannalu aallaavigalugu oqallittoqarnissaa Naalakkersuisut kissaatigaat.