Jens B. Frederiksen: Suliaq pillugu paasissutissat tamakkiisumik saqqummiunneqartariaqarput

Svend Hardenbergip Nukissiorfinni pisortatut soraarneranut atatillugu allagaatinik paasitinneqarnissani Radioaviisip kissaatigisimavaa. Sulili akissuteqartoqanngitsoq Svend Hardenberg Sermitsiaq.AG-mut tamanna sioqqullugu saaffiginnissimavoq, pisullu nammineq isiginninnermisut oqaluttuaralugit, Jens B. Frederiksenilu politikkikkut ilaatigut tassani malersuisimanerarlugu.

Suliap tamakkiisumik saqqummiunneqarnissaa, Jens B. Frederiksenip taamaammat maanna kissaatigaa, Naalakkersuisulli siulittaasuata akissuteqaataa naammaginagu:

- Uanga isumaga naapertorlugu akissutitut taaneqarsinnaanngilaq, tassami ataatsimilluunniit akinngilaanga, Jens B. Frederiksen, Aleqa Hammondip akissuteqaataa pillugu oqarpoq, nangillunilu:

- Svend Hardenbergip nammineq saqqummiisimanera pissutigalugu ajornartoqanngiivippoq Naalakkersuisut siulittaasuata saqqummiuppagu taamanikkut qanoq pisoqarsimanersoq. Tamatigut toqquinnarsinnaanngilaq oqaannarluni sulisut ataasiakkaat pissutigalugit oqaaseqarsinnaanani, Demokraatit siulittaasuat oqarpoq.

Svend Hardenbergip Nukissiorfinni pisortatut soraarneranut atatillugu allagaatinik paasitinneqarnissani KNR-ip siusinnerusukkut kissaatigisimavaa, Svend Hardenbergili suli akissuteqanngitsoq Sermitsiaq.AG-mut nammineq saaffiginnissimavoq, pisullu nammineq isiginninnermisut oqaluttuaralugit. Tamanna pissusissamisuunngilaq, allaffissornikkullu kukkunerulluni, Jens B. Frederiksen oqarpoq:

- Tusagassiortut arlallit Svend Hardenberg pillugu paasissutissanik pinissartik taamanikkut piumasarivaat, taava Svend Hardenberg nammineq saqqummiivoq tusagassiortut sioqqunniarlugit. Tamanna pissusissamisoortutut isigineqarsinnaanngilaq, aamma allaffissornikkut annertoorujussuarmik kukkunertut nalilerneqartariaqarpoq, Jens B. Frederiksen oqarpoq.

Jens B. Frederiksenilu politikkikkut malersuinerarlugu Svend Hardenbergip oqaasii aamma pissusissamisuunngitsut, Demokraatit siulittaasuata oqaatigaa, atorfilittammi arlaannaannulluunniit attuumassuteqaratik sulisussaammata, Jens B. Frederiksen oqarpoq:

- Pissusissamisoortutut isiginngilara, Namminersorlutik Oqartussani pisortaaneq illuatungiliuttuni politikeri taama ersaritsigisumik uparuarmagu. Taanna aamma pissusissamisuunngilaq, arlaannaannulluunniit attuumassueqarani sulisussaavoq, Demokraatit siulittaasuat Jens B. Frederiksen, oqarpoq.

Namminersorlutik Oqartussat pisortaanerat Svend Hardenberg suliaq pillugu ullaap tungaani oqaaseqartinniaraluaratsigu iluatsinngilarput.