Jens B. Frederiksen kuussuup aseruatitsigaanut takuniaalerpoq

Kangerlussuarmi Akuliarusiarsuup kuussuisa katinnerat suli supisorujussuuvoq.

- Imeq meterip ataatsip missaannik qujanartumik appariarsimavoq, Frits Baumann Petersen, Qeqqata Kommuniata Kangerlussuarmi ingerlatsinermut akisussaasorititaa KNR-imut oqarpoq.

Taava isumaqartoqarsinnaavoq pissutsit pitsanngoriartortut, taamaanngilarli.
Imermi 1 meterip missaannik appariarsimagaluartoq Akuliarusiarsuup kuuisa katinnerat suli supisorujussuuvoq. Kuussuummi qarsutsinera siaruariartuinnarsimasoq, Frits Baumann Petersen oqarpoq:

- Ikaartarfiit marluk taakku akornanni 20 meteritut silitsigisumik maanna putoqarpoq, ikaartarfillu kujasinnerusup Maniitsup tungaanut qaninnerusumi sapusiap tungaanut 30 meterit missaannik silitsigisumik putuliorsimavoq. Taamaammat oqarsinnaavugut kuuk sisamanut maanna avissimasoq, Frits Baumann Petersen oqarpoq.

Akuliarusiarsuup kuuisa katinnerata qarsutsinera pissutaalluni ikaartarfiit nunaqarfiup avannarpasissortaanik kujasissortaanillu atassusiisut kuugussaapput.

Qeqqata Kommuniani borgmesterip Hermann Berthelsenip Kangerlussuarmi pisoq pinngortitami ajunaarnersuartut isigaa, ikiorneqarnissartillu pillugu kommuni sinnerlugu Attaveqarnermut Naalakkersuisumut Jens B. Frederiksenimut saaffiginnilluni.

Naalakkersuisoq ima oqarpoq:

- Massakkut Kangerlussuarmukalerpunga, aamma borgmesteri Hermann Berthelsen kajumissaarpara Kangerlussualiaqqullugu, taamaaliornikkut Kangerlussuarmi naapissinnaassagatta oqaloqatigiillutalu, takusaasinnaallutalu. Taamalioreerutta siunissami qanoq pisoqassanersoq oqaatigiumaarparput, Attaveqarnerrmut Naalakkersuisoq Jens B. Frederiksen oqarpoq.

Kangerlussuarmi pisut qanoq aaqqiivigineqarniarnersut sukumiinerusumik oqaaseqarfigisinnaanngikkallarnerarpai.

Ikaartarfiup aaqqinneqarnissaanik ikiorneqarnissartik tassungalu atatillugu aningaasaliiffigineqarnissartik Qeqqata Kommuniata kissaatigaa, Kangerlussuarmilu pisut pillugit ippassaq ataatsimeereerlutik Namminersorlutik Oqartussat qinnuigaat aqutsisoqatigiinnik pilersitseqqullugit.

Taakkua Silaannakkut angallanneq pillugu naalagaffiup oqartussaasuiniit, Mittarfeqarfinniit, Namminersorlutik Oqartussaniit kommunimiillu inuttalerneqassapput, Kangerlussuarmilu ajornartoorfiusumi iliuuseqarneq ataqatigiissaassallugu.

Aqutsisoqatigiinnilli pilersitsisoqassanersoq pilersitsisoqassannginnersorluunniit Attaveqarnermut Naalakkersuisup Jens B. Frederiksenip kingusinnerusukkut aatsaat oqaaseqarfigerusuppaa, Kangerlussuarmiinnermini susassaqartut ataatsimeeqatigeqqaarusukkamigit.

- Taannarpiaq pilllugu oqaaseqarusunngilanga. Aatsaat Kangerlussuarmeereeruma tamanna aalajangiiffigiumaarparput, Attaveqarnermut naalakkersuisoq oqarpoq.

Eqqakkanik isumaginninnerup aaqqivigineqarnissaa, Qeqqata Komuniata maanna isumagileruttorpaa. Ikaartarfiummi kuugussaanerta kingunerisaanik kommunimi sulisut eqqaavik tikissinnaajunnaavaat.