Jens B. Frederiksen: Imarsiornermi inatsit imaaliallaannaq aaqqiivigineqarsinnaanngilaq

Imartatsinni umiarsuit angaleranni, sinerissatsinnik ilisimannittunik taakku ilisimasortaqartarnissaat inatsisinngortinneqartariaqartoq, Imarsiornermi Ilinniarfiup pisortaata piumasaraa.

Inatsisiliuussinissarsi imaaliallaannaq pisinnaanngitsoq, Angallanermut naalakkersuisoq, Jens B. Fredriksen oqarpoq.

Taassuma oqaatigaa, imarsiornermi inatsit qallunaat oqartussaasuiasa akisussaaffigimmassuk nunanilu tamalaani aalajangersakkat aamma isiginiarneqartariaqartariaqarmata, inatsimmik maleruagassiinissaq imaaliallaannaq pisinnaanngitsoq oqaatigalugu.

Umiarsuaq Vega Sigattarius, Afrikap kitaani Liberiameersoq, Royal Arctic Line-millu attartugaasoq, sisamanngornermili augustip 17-anni Nuup kitaani ikkarleqqalerpoq, sulilu ulloq manna tikillugu kaanngartinneqarani.

Umiarsuaq uuliamik assartuut, Oratank, Polar Oilimit attartugaasoq Aasiaat eqqaani, marlunngornerup unnuaani aamma ikkarlippoq. Taannali nammineerluni ikkarlummit kaanngarsinnaasimalluni.

Umiarsuit marluk piffissap sivikitsunnguup ingerlanerani ikkarliiput, tamannalu eqqarsarnartoqarpoq.

- Soorunami tamanna eqqarsarnartorujussuuvoq, Angallannermut naalakkersuisoq, Jens B. Fredriksen oqarpoq.

Aamma Paamiuni Imarsiornermi Ilinniarfiup pisortaata, Mannarsinnguaq Noahsenip tamanna eqqarsarnartoqartippaa, oqaatigalugu maanna piffissanngortoq, umiarsuit nunat allaneersut, Nunattalu imartaatigoortut kalaallimik ilisimasortaqartarnissaat pisussaaffiulertariaqartoq inatsisinngortinneqartariaqartorlu.

Tamannali imaaliallaannaq piviusunngortinneqarsinnaanngilaq, Angallannermut Naalakkersuisoq, Jens B. Frederiksen oqarpoq.

- Susassaqarfik Danmarkimi Søfartsstyrelsep akisussaaffigaa. Kisiannili kissaatigisimavarput, angallatit ilisimasortaqartarnissaat. Upernaarlu kingullermik paasiniaavugut suliassaq tamanna sumut killinnersoq, Jens B. Frederiksen oqarpoq.

Umiarsuit Nunatsinni angerlarsimaffeqanngitsut, Nunatta imartaani angalatillutik, pinngitsooratik Nunatta imartaanik ilisimannittumik ilisimasortaqartanissaannik, Inatsisartuni ilaasortaq, Josef Motzfeldt Inatsisartut 2008-mi upernaakkut ataatsimiinnissaannut aalajangiussassatut siunnersuuteqarpoq.

Taamanilu Naalakkersuisuusut, Siumukkut siuttuuffigineqartut naliliipput, ilisimasortaqartarnissaq siunertaqanngimmat, siunnersuut itigartitsissutigineqartariaqartoq.

Imartatsinni umiarsuit angalaneri qallunaanit akisussaaffigineqartsillugu, suliaq imaannaanngitsuuvoq, aammami nunat tamalaat aalajangersagaat isiginiarneqartariaqarmata, Jens B. Fredriksen nassuiaavoq.

- Uani nunat ataasiakkaat pineqanngillat nunanili arlani isumaqatigiissutaasimasut akuutinneqartussaallutik. Taamaattumik tupigineqassanngilaq suliap arriitsumik ingerlanera, oqaatigissavarali uagut piumasarigaluaratsigu suliap sukkanerusumik ingerlanneqarnissaa, Angallannermut naalakkersuisoq, Jens B. Frederiksen taama oqarpoq