Jens B. Frederiksen akissutigineqartoq naammaginagu apeqquteqaqqippoq

Taava Ineqarnermut, Pinngortitamut Avatangiisinullu Naalakkersuisup Miiti Lyngep uiata annikitsumi aatsitassarsiorsinnaanermut akuersissummik pigisaqarnera akuersaarpaa.

Tamanna pissuserissaarnissamik isummamut uniuuppa ?

Taama isumaqarpoq Jens B. Frederiksen. Taassuma paragraf 37 naapertorlugu apeqquteqaammut akissutissarsiarisani naammaginngilluinnarpaa.

Aleqa Hammond radioaviisimut nalunaarutigivaa, pineqartoq pillugu oqaaseqaqqinniarani siornatigut akissutigisimasamini naammattumik nassuiaateqarfigereeramiuk.

Demokraatit siulittasuata akissutigineqartoq naammaginngilaa.

Tamaattumik siornatigut apeqqutigisimasani Naalakkersuisut siulittaasuanut apeqqutigeqqipaa.

-Misigisimavunga Aleqa Hammond apereqqqittariaqarlugu - tassami apeqqutiga akinnginnamiuk,  Jens B. Frederiksen oqarpoq.

Apeqqutigineqartunut aallaaviupput Naalakkersuisut siulittaasuata siornatigut  apeqqutigisimasai

- Aleqa Hammond 2010-mi Naalakkersuisunut illutungiliuttuunermini    Naalakkersuisut siulitttaasuata Kuupik Kleistip taamanikkut aapparisaa  aamma aatsitassanut Naalakkersuisup Ove Karl Berthelsen-ip nulia  aatsitassarsiornermut akuersissuteqarnerarlugit oqarpoq, tassaanerarlugu imminut sullinneq peqquserluttuliortutullu nalilerlugit, Jens B. Frederiksen oqaropq.

Taamaattumik Jens B. Frederiksenip annikitsumi aatsitassarsiornissamut akuersissuteqarneq pillugu  Aleqa Hammond isumaa allanngorsimanersoq paasiniarlugu apeqquteqarpoq.

Jens B. Frederiksen isumaqarpoq apeqqutigisani tassalu arlaannaannulluunniit pituttorsimanani suliarinnittarnermut malittarisassat malinneqarsimanersut akissuteqarnermi nassuiarneqanngitsoq.

Naalakkersuisunut ilaasortap Miiti Lyngep uiataluunniit aatsitassarsiornissamut akuersissussut pigisartik tigumiinnarniarlugu aalajangerpata taava taanna pillugu Aleqa Hammond-ip isumaa allangorsimanersoq  Jens B Frederiksen-ip paaserusullugu apeqquteqarpoq.

Aleqa Hammond-ip akissuteqaataa  Jens B. Frederiksen-ip naammaginngilaa.

- Apeqqutigisara erseqqissumik akineqanngimmat apeqqutigeqqippara, taamaattumik neriuutigaara ersarissumik akineqassallunga, Demokraatit siulittasuat Jens B. Frederiksen oqarpoq.