Jehovap nalunaajaasui Sisimiuni ataatsimeersuassapput

Nunarsuaq tamakkersulu Jehovap nalunaajaasui 7 millionit 8 millionillu akornanni amerlasusseqarput. Sisimiunilu Taseralimmi ataatsimeersuarnissami inuit 200-t missaat peqataasinnaanissaat neriuutigineqarpoq.

-Inuppassuarnit oqaatigineqartarpoq aaliangiiniarnerminni uummatertik malillugu aaliangertarlutik, uummalli aamma kukkusinnaavoq. Taamattumik innersuutigerusupparput aaliangiiniarnerni pingaartuni niaqqup eqqarsarluarnikkut atorneqartarnissaa. Tassalu ilaatigut Sisimiuni naapisimaarnissatsinni ilikkagaqarfiusinnaasut ilaat. Ukiuni amerlasuuni Nuummi naapisimaartareerluta ukioq manna Sisimiuni naapisimaassaagut. Neriuutigaarpullu innuttaasut soqutiginnillutik Guutillu oqaasiinik tusagaqarnerorusullutik ornigukkumaartut, Thomas Bohnfeldt Jehovap nalunaajaasuini paasissutissiisartoq taama oqaluttuarpoq.

Nunatsinni nalunaajaasut 200-t missaaniipput, taakkunanngalu affaata missaat Kalaaliupput. Maluginiarneqarsimavoq Jehovap nalunaajasuinut soqutiginnittoqarluartoq, nalunaajaasullu nalunaajaasunngornissamik soqutiginnittunut pulaakulasarput.

-Ilaasortatsinnut annertuumik piumasaqaateqarpugut, neriuutigaarpullu soqutiginnittut allat aamma Sisimiuni naapisimaarnissatsinni peqataajumaartut. Saqqummiinerit sammisassallu 50-t missaaniittut weekendimi pissapput. Nalunaajaasunut nutaanut siunnersuinissatsinnut piareersimalluarpugut. Sisimiunilu ataatsimoornissatsinni siunertaraarput Bibelimik atuaqatigiinnitsigut Guutip oqaasiisa paasillugit ilinniarfiginissaat, Thomas Bohnfeldt taama oqarpoq.

Taassumallu amma ilanngullugu oqaatigaa Taseralimmi ataatsimoornerminni soqutiginnittut akeqanngitsumik isersinnaasut