Jazz Kalaallit Illuutaanni
Tusarnaartitsineq nalunaaqutaq sisamanut aallartikkuni, kingorna tuttup neqaanik siatamik marmarluinnartumik sassaallisoqassaaq.
-Aaqqissuussinermi uani peqataanerput maani Københavnimi kulturikkut saqqumilaarniarnitsinnut nukittorsaaqataassaaq. Pele Møllerimiillu saaffigineqaratta ingerlannaarluta isumassarsiatsialak peqataaffiginiarsimavarput. Festivalimilu peqataanitsinni iluatsillugu Kalaallit Illuutaanni pisartut saqqummiussinnaassavagut, Søren Thalund, Kalaallit Illuutaanni sulisoq taama oqaluttuarpoq.
Akuttunngitsunik Kalaallit Illuutaanni pisoqartitsisoqartarpoq. Qanittumilu nipilersortartoq Simon Lynge pulaartorineqarsimavoq. Sapaatillu akunneranut nereqatigiittarneq maanna aasanerani sapaatip akunnerani marloriarluni pisarpoq.
-Pele Møller Bandip nipilersornissaanik isuma pitsaalluinnarpoq, tusarnaariarusuttunullu suli inissaqarluarpoq. Kalaallit arlallit maani Danmarkimi najugaqartut tusarnaariarnissaminnut billetsisereersimapput. Naatsorsuutigaarpulli tusarnaariat allat Kalaallit jazzianik aamma tusarnaariarluarumaartut, Søren Thalund naggasiivoq.
Kalaallit Illuutaat pillugu annerusumik uani atuagaqarit: www.sumut.dk - jazz.dk