Javnaðarflokkurin Savalimmiuni qinersinermi ajugaasoq
Savalimmiuni ippassaq sisamanngornermi qinersisoqarnerani socialdemokratit Javnaðarflokkurin ajugaapput.
Javnaðarflokkurin Lagtingemi inissani 33-usuni qulingiluanik isertitaqarpoq qinersinermi siullermi arfineq-marluusimagaluarmata taamaalilluni isertut marlunnik ilapput.
Partii Javnaðarflokkurin qinigaaffiit siuliini illuatungiliuttutut inissisimasarsimavoq, qinigaaffiillu siuliini taaguunneqarnera 22,5 procentiusimagaluartoq maanna 26,6 procentimut qaffappoq.
Oqaatigineqarporli taakku kikkunnik naalakkersuisoqateqarumaarnissaat suli nalunarallartoq.
AAMMA ATUARUK Savalimmiuni qinersineq: Uku qulequttat pingasut sammineqarnerupput
Partiip siuttuata Aksel V. Johannesenip siusinnerusukkut oqaatigaa Javnaðarflokkurin arlalinnik suleqateqarsinnaasoq ilaatigut soorlu Savalimmiut namminiilivinnissaannik oqariartuuteqartuusoq aammalu illuatungiliuttutut inissisimajuartartoq Tjóðveldi suleqatigisinnaanerarpaa, taamatuttaaq partiit talerperliit Sambandspartiet suleqatigisinnaanerarlugu.
Taamaalillunilu partii siuttuusimagaluartoq Sambandspartiet matumani qinersinermi ajorsarpoq.
Partiit talerperliit Sambandspartiet aamma Folkeflokken ukiuni kingullerni naalakkersuisoqatigiikkaluarput. Taakkulu tamarmik qinigaaffimmi matumani amerlanerussuteqanngitsoorput naak qineqqusaarnerup nalaani ingerlaannarnissartik ilimagigitsik oqaatigisarsimagaluarlugu.
