Aleqa HammondAssi: KNR

Japanimiut naalakkersuisunut neriuuteqalersitsisut

Naalakkersuisut Japanimiut ministerianit tikeraarneqarneq immikkut maluginiarpaat, periarfissanillu ammaassisutut isigalugu.

Nunat allat aallartitanik Kalaallit Nunaannukartitsisut japanimiut, ullumikkumut soqutiginninnerat malunnarsimanngikkaluartoq, ministerimik aggertitsinerat Naalakkersuisunit suleqatigiinnerulernissamut periarfissatut isigineqarpoq.
 
Naalakkersuisut siulittaasuata, Aleqa Hammondip, Japanimit ministerimit tikeraartoqarneq annertunerusumik suleqatiginnikkusunnermik nassataqartoq oqaatigaa.

- Maannakkut soqutiginninnerat allatut sammiveqarpoq. Niuernikkut aammalu aatsitassarsiorfiup silarsuaani Nunatta periarfissai japanimiut peqataaffigerusuppai. Taamaattumik oqaluttuarisaanermi siullerpaamik Japanimiut ministerianit tikeraartoqarnerput pingaaruteqartorujussuuvoq, Naalakkersuisut siulittaasuat, Aleqa Hammond, nassuiaavoq.

Japanimiut Kalaallit Nunaannut soqutiginninnerat annertusoq erseqqissarpaa. Taamatuttaaq suleqatigiinneq siornatigornit annertunerusoq aallartikkusukkaat, tamannalu Japanimi naalakkersuinikkut aalajangerneqareersimasoq. Tamannalu nunatsinnit tikilluaqquneqassasoq.

- Nunap toqqaannartumik nunatsinnik soqutiginninnera immikkut ittoq suleqatigiissuteqarfigissavarput, ilisimatusarnikkut, ilinniartitaanikkut, aalisakkanik nioqqutissiornikkut aamma aatsitassarsiorfitsigut, Aleqa Hammond KNR-imut oqarpoq.

Isumaqatigiissutit pitsaasut

Taassuma erseqqissarpaa maanna pingaaruteqartoq isumaqatigiinniarnerit eqqortumik pitsaasumillu ingerlanneqarnissaat, siunissami suleqatigiinnissaq piviusunngussappat.

Aleqa Hammondip oqaatigaa japanimiunik suleqateqarnissamut aalisarneq aatsitassarsiornerlu kisimik periarfissaanngitsut. Periarfissalli nutaat aamma ujartorneqartut ammaffigineqarlutillu.

Japanimiut ministeriata tikeraarnera ukiuni qaninnerni isumaqatigiissusiornermik inerneqassasoq Aleqa Hammondip neriuutigaa.

- Neriuppunga piffissaq qaninnerpaaq isumaqatigiissusiorsinnaalluta. Takorloorpara niuernikkut isumaqatigiissummik kinguneqassasoq. Aamma takorloorpara angallannermi pingaaruteqartut aningaasaliiffigineqarsinnaasut aamma isumaqatigiissutikkut inerneqassasut.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat