Japanimiu Nersornaammik sølviusumik tunineqartoq
Aalisakkanit tunisassiat eqqarsaatigalugit, Nunatta Japanillu akornanni niueqatigiinneq niuernikkullu attaveqaatit siuarsarniarlugit ineriartortinniarlugillu ukiorpassuarni ilungersorluni tunniussimallunilu suliniuteqarsimanera tunngavigalugit, Inatsisartut Siulittaasoqarfiata Shimoda Takaaki sølviusumik Nersornaaserpaat.
Lars-Emil Johansenip nersornaasiinermut atatillugu oqaaseqarnermini ilaatigut makku erseqqissarpai.
- Japanimiut pitsaassutsimik pingartitsinertik aalisakkanillu nioqqutissianik nuannarisaqarnertik ilisarnaataasa ilagaat. Illilli Japanimiut tuniniaasartut ikittunnguit ilaattut Japanimi niuerfinnut qaleralik eqqussimavat. Tamatuma kingorna issittup kinguppai, saattuat, suluppaakkat arnarluillu suaat aamma eqqullugit, Lars-Emil Johansen ilaatigut taama oqarpoq imalu nangilluni.
- Tamanna ima iluatsissimatigaaq, illit Shimodo Takaaki siuttuuninni Royal Greenlandip Japanimi ingerlatseqatigiiffiani aqutavit kaaviiaartitai qallunaat aningaasanngorlugit milliardit affaannit annertunerulersimallutik. Lars-Emil Joahnsen nersornaasiinermi ilaatigut taama oqarpoq.