Japanimi umiarsuarmi tunillatsissimanngitsut niorartut - tunillatsissimasullu 79-inik amerlisut

Umiarsuarmi takornariartaammi Japanimi maanna mattussaaqqasumi issimasuni coronavirusimik tunillatsissimasut 79-inik amerlipput.

Japanimi peqqinnissakkut pisortaqarfiit taama ilisimatitsissuteqartut, nutaarsiassaqartitsivik Reuters allappoq.

Umiarsuarmi tunillatsissimanngitsut siulliit umiarsuarmit coronaviruseqarfiusumit niorarnerisa kingunitsianngua taama nalunaaruteqarput.

Umiarsuaq takornariartaat "Diamond Princess" coronavirusimik tunillatsissimasunik issimasoqarmat Yokohamap Tokyop eqqaaniittup avataani sapaatit akunnerini marlunni mattussaaqqavoq.

Tunillatsissimasut 79-inik amerlinerisa kingorna umiarsuarmi issimasuni nualluummik coronavirusimik toqqutigineqarsinnaasumik tunillatsissimasut maanna 621-nngorput.

Nualluutip umiarsuarmi tuniluutileruttornerani inuit umiarsuarmi issimasut 3700-t missaanniipput. Taakkunannga affaasa missaat japanimiuupput.

AAMMA ATUARUK Umiarsuarmi takornariartaammi coronavirusimik tunillanneqarsimasut 39-inik amerlisut

Umiarsuarmi issimasunik misissuinermi tunillatsissimanngitsutut nalunaarutigineqartut siulliit 500-t missaanniittut umiarsuarmit pingasunngornermi niorassangatinneqarput.

Tunillatsissimanngitsutut nalunaarutigineqartut kingulliit pilersaarutit malillugit umiarsuarmit kingusinnerpaamik tallimanngornermi niorassapput.

Japan Kina tulleralugu inunnik coronavirusimik tunillatsissimasunik siumugaqarfiunerpaavoq.

Japanimi peqqinnissakkut pisortaqarfiit umiarsuarmik takornariartaammik nualluummik tuniluuffiusumik mattussinertik iliuuserisimasatillu pillugit isornartorsiorneqarput.

Qaffasissumilli atorfilittat umiarsuup mattunneqarneranut tassanilu issimasunik misissuisoqarneranut illersuillutik tapersiipput.

Issimasut umiarsuup mattussaaqqanerani iniminniiginnaqquneqartut, nutaarsiassaqartitsivik AFP allappoq.

AAMMA ATUARUK Takornariartaammi coronavirusimik tunillanneqarsimasut amerlisut

Silaannarissaqqusaasarpulli, kiinnatilli assiaqusersimanissaat aaqqasersimanissaallu aamma ilaasunit allanit ungasinniartarnissaat piumasaqaataalluni.

Suliniutilli ilumut iluaqutaatisimanersut apeqquserneqarput. Issimasorpaaluimmi nualluummik tunillatsissimasutut ullualuit ingerlaneranni nalunaarutigineqartut arlaqarput. Tunillatsisimasullu tamatuma kingorna 621-nngorlutik.

Umiarsuarmi inuttat mattussaaqqanngillat, inersuarmili ataatsimoorlutillu ataatsimorussamik uffarfeqarput.

Amerikamiut 300-nit amerlanerusut umiarsuarmit sapaatip akunnerata aallartinnerani qimagutitinneqarlutik niusinneqarput. Taakkunannga 14-t coronavirusimik tunillatsissimapput.