Umiarsuarmi takornariartaammi coronavirusimik tunillanneqarsimasut 39-inik amerlisut
Umiarsuarmi takornariartaammi "Diamond Princess"-imi ilaasut akornanni coronavirusimik tunillanneqarsimasut 39-nik amerlisut paasineqarpoq. Japanami peqqinnissaqarfik taama ilisimatitsivoq.
- Inuit 53-it misissorpavut, taakkunanngalu 39-t tunillanneqarsimasut paasivarput, Japanip peqqissutsimut ministeria Katsunobu Kato.
AAMMA ATUARUK WHO: Coronavirusip tunillaassuunnera aarlerinartorujussuuvoq
Umiarsuarmi takornariartaammi mattussaaqqasumi ilaasut katillugit 3700-t akornanni coronavirusimik tunillanneqarsimasut taamaasillutik 174-inngorput.
Tunillanneqarsimasut napparsimmavimmut unitsitaasut
Virusip tuniluussinnaanera pissutaalluni umiarsuaq februaarip ulluisa 19-iata tungaanut mattussaaqqavoq, mattussaaqqaneralu aamma sivitsorneqarsinnaalluni.
Inuit tunillanneqarsimasut Japanimi illoqarfimmi Yokohamami napparsimmavimmut unitsinneqarput.
AAMMA ATUARUK Takornariartaammi coronavirusimik tunillanneqarsimasut amerlisut
Umiarsuarmi takornariartaammi mattussaaqqaneq qanoq innersoq, ilaasut inuit internetikkut attaveqaqatigiittarfiisigut oqaluttuaraat.
Sukangasunik malittarisassaqartoq
Ilaasut tamarmik iniminniiginnaqquneqarput, ikittuinnaallutillu piffissami aalajangersimasumi silaannarissariartorsinnaatitaallutik.
Inuit silaannarissartut kiinnatik assiaqusersimasassavaat, ilaasullu allat minnerpaamik 2 meterinik ungasitsigissallugit.
Umiarsuaq imermik nerisassanillu pilersorneqarpoq, tamakkuli aamma killilersorneqarlutik. Nerisassat namminneq toqqarneqarsinnaanngillat, qaqugukkullu nerinissaq nammineq aamma aalajangerneqarsinnaanani, ilaasullu imigassamik aalakoornartumik imeqqusaanatillu pujortaqqusaanngillat.