Japanimi eqqaaniaasut

Qimuttuitsut unipput, inuit aqqusinerni angallattut unipput, inuillu tamarmik nipaarulluinnarlutik niaqqutik sikitippaat.

Eqqaaniarneqartoq tassaavoq nunap ukiup ataaserpiaap matuma siorna sajorujussuarnera, nunap sajuttarneranut uuttuut malillugu 9,0-imik sakkortutigisumik, kinguninngualu tassaarsuarujussuarpoq inuit 19.000-t missaasa ajunaarfigisaannik. Sorparujussuit piuneerupput.

Nuna tamakkerlugu Tokyomi eqqaaniaanermi kejseri Akihito, aamma ministeriuneq Yoshihiko Noda, tamarmik qernertunik atisaqarlutik, portunersami naasunik qaqortunik ulikkaavissumiit, ajunaarsimasunut ilaqutaannullu nipaatsumik qinnussipput, qulaannilu japanimiut erfalasui qiteqqusimasut sumi tamaani takussaapput.

Kejseri, uummammigut sapaatip-akunnerisa pingasut matuma siorna suliaritittoq, oqarpoq, ajunaarnersuaq Japanip qaquguluunniit puigornavianngikkaa, pingaaruteqaqisorlu oqalugiarnermini aamma eqqaavaa, tassa ajunaarnersuaqarsimagaluartoq inuit ataqatigiinnerat, japanimiusut "kizuna", qanoq pingaaruteqarlunilu pisariaqartigisoq.

- Ajunaarnersuaqarfiusut sanaqqinniarneranni ajornartorsiuterpassuit suli siumortussaavavut.

- Neriuppunga inuit ajunaarnersuarmit eqqugaasimasut pisortat kikkulluunniit uummammioriuassagaat, inuunerisalu pitsanngoqqinnissaanni ikiortuarumaaraat, kejseri Akihito oqarpoq.

- Ajunaartut ilaqutarpassui Japanip avannamut-kangisissuani sineriak tamakkerlugu illoqarfinni, nunaannarmilu illoqarfinni tamani, suli aseruatitersimaqisuni katersuupput, tassaarsuarujussuup nuna aqqusaalutoralugu suna tamaat nassatarimmagu, ajunaartut eqqaaniarlugit.