Jakob Janussen danskit aviisiannut: IA ajugaarujussuarsinnaavoq

Qinersisartut isumaannik oktobarimi paasiniaanerit marluk ilimasaarutigaat, IA 13-inik aqqaneq marlunnilluunniit Inatsisartunut isertitaqassasoq, Siumut aqqanilinnik isertitaqartoq.

Ilisimaneqartutulli naalakkersuisuutitaqarniaraanni Inatsisartuni tunuliaqutit ikinnerpaamik 16-iusariaqarput. Taamaammat novemberip 28-iani qinersinermi partiit minnerusut pilernguneqassasut, Politiken allappoq.

Tassami IA-p Siumullu Partii Naleraq, Partii Inuit, Atassut Demokraatilluunniit tapersersortiginissaat pisariaqartippaat. Pissanganarluinnartumik pisoqaratarsinnaasoq, aviisi allappoq.

- Naatsumik oqaatigissagaanni IA aamma ajugaasinnaavoq, soorlu sulisartut kattuffiata LO-p siulittaasua Thomas Nielsen oqarnikuusoq ”Ajugaarujussuarpugut iluamik atorsinnaanngisatsinnik”, politikkikkut oqaaseqartartoq Jakob Janussen aviisimut Politikenimut taama oqarpoq.

Uranisiulernissamut apeqqut qinersinerup inerneranut aalajangiisooratarsinnaasoq

Inuit Ataqatigiit aamma Partii Naleraq uranisiornissamut kisiartaallutik akerliupput, Partii Naleqqallu pingasunik isertitaqarnissaa ilimagineqarluni.

Taakku partiit marluk naalakkersuisuutitaqaleratarsinnaapput. Taamali ajornanngitsiginavianngilaq, tassami Partii Naleqqami siulittaasoq Siumumit nuunneruvoq.

Katersuunneq alla periarfissaasoq tassaavoq IA Demokraatillu isumaqatigiissuteqarnissaat. Demokraatilli uranimik piiaanissamut akuersaarput, IA-millu tamanna akuersaarneqarani, Politiken taama allappoq.

HS Analyse Sermitsiarlu suleqatigiillutik innuttaasunik isumasiuineranni (piffissami oktobarip 25-aniit 27-anut) paasineqarpoq IA siuttuugallartoq, tassalu 40,8 procentinillu taaneqarluni, Siumullu 34,5 procentinik taaneqarluni.