Jørgen Brønlundip suliai podcastimi nutaami saqqummerseqqinneqartut
Tassami oqaluttuaatitoqqatsinnik radiukkut tusarnaagassiat alutornartut tusaruminartullu saqqummersinneqaqammerput.
Tusagassioriaaserli podcasting sunaana? Paasiniarparput.
Tusagassioriaaseq podcasting tassaavoq radiukkut nipinik assigiinngitsunik atuilluni oqaluttuariaaseq atortutigut digitaliusutigut qaqugukkulluunniit tusarnaarneqarsinnaasoq.
Arnat kalaallit marluk, tassa Bibi Nathansenip Aminnguaq Dahl Petrussenillu podcasting atorlugu oqaluttuaatitoqarput Jørgen Brønlundimut tunngasoq “Ajunaalernermik Nalunaarut”-mik qulequtserlugu saqqummersippaat.
Podcastingimillu atuilluni oqaluttuarneq tusagassiutitulli allatulli inngilaq:
- Nipit atorlugit takorluuilersitsisarami, soorlu filmini nalinginnaasuni imaattarami skærmimi immaqaluunniit fjernsynimi assit nuereertarput, inuup nammineq takorluuisinnaanera unitsiusallugu.
- Inerneqariinngilaq, inuup nammineerluni takorloortussaavaa oqaluttuaq, Bibi Nathansen oqarpoq.
Taassuma Aminnguaq Dahl Petrussenillu tusarnaagassiaq "Ajunaalernermik Nalunaarut" januaarip sisamaanni saqqummersippaat. Tusarnaagassiaq piviusumik tunngaveqarpoq, ilisimasassarsioqataasumullu Jørgen Brønlundimut tunngalluni.
Oqaluttuaq kalaallinut ilisimasassarsiornerpassuarni peqataasimasunut eqqaaniutaalluni kulturitsinnut pingaarutilittut inissisimammat tusartinnissaa pingaartippaat:
- Taamani soorlu taamatut paasisassarsiorluni aallaraanni kalaalersat imatut oqaluttuarineqarneq ajoramik,
Suleqataatalu Aminnguaq Dahl Petrussenip ima taperpaa:
- Taavalu aamma inuttut kinaana ilaa, neriuppugut aamma ersarissisoq taanna.
Jørgen Brønlund Tunup avannaarsuani 1907-imi ilisimasassarsioqataanermini ajunaarpoq.
Tusarnaagassiat akeqanngitsumik nittartakkakkut uani aaneqarsinnaapput.
Qapuppaluup podcastia pillugu itinerusumik uani atuagaqarsinnaavutit.