IWC-mi ilaasortat akilersillutik taasisarnerarneqarput
Arfanniarnermut ataatsimiititaliarsuarmi ilaasortat aallartitaasa Marokkomi ataatsimiinnissaat sioqqullugu tamanna saqqummiunneqarpoq.
Assersuutigalugu IWC-p siulittaasuata tullia Anthony Liverpool – IWC-p ataatsimiinnerani aqutsisussaq - sissap qanittuani hotelersuarmi atortorissaaqisumi ineqarnissaminut isertortumik akiliunneqarsimavoq - tamatumalu saniatigut timmisartumut billettinik 35.000 koruuninillu atoriaannarnik pissarsisimalluni.
Allartitat nunanit tallimaneersut hotelimi najugaqarnissaat Japanimit akilerneqarsimasoq, aviisimi Politikenimi allaaserineqarpoq.
Nunat ineriartortut arlallit aallartitaat Japanimiut siunnersuutaannut aningaasanik arnanillu atortittartunik neqeroorfigineqartarsimasut, tusagassiortut isertortumik immiussaanni saqqummiunneqarpoq.
Nunat pineqartut ilaatigut tassaapput Elfenbenskysten, Grenada, Guinea kiisalu Marshallip qeqertai.
Nunat ineriartortut aallartitaasa ilaat isertortumik immiussani nassuerluni oqarpoq Japanip tunissutai taasinerminut aalajangiisuusartut.
Arfannianermut ataatsimiititaliarsuarmi ilaasortat isumaqatigiissutaat naapertorlugu aallartitat aningaasartuutaat nunat ataasiakkaat namminneq isumagisassavaat. Taamaattumik Tuluit Nunaanni aalisarnermut ministerip Richard Benyonip akilersilluni taasisarneq ataatsimiinnermi oqaluuserisassanngortippaa.
Japanip arfanniarnermut ataatsimiititaliarsuarmi ilaasortanik tapersersortissarsiortarnini eqqunngitsuusoq Japanimiut ataatsimiititaliarsuarmi ilaasortaatitaat aviisimut Sunday Timesimut oqarpoq.
