Ivigaasalinnik arsaattarfiliorniarnerit qassiiliutaalerput
Illoqarfinni anginerni ivigaasanik qallikkanik arsaattarfeqalernissaanik siunnersuutini Naalakkersuisunit, IA-mit Atassummillu naaggaarneqareersorlu, Demokraatineersup Niels Thomsenip Naalakkersuisoqarfiit ilaat maanna unnerluutigaa.
Naalakkersuisut, IA Atassullu siunnersuummut naaggaarput, tusarniaarnermi Kalaallit Nunaanni Timersoqatigiit Kattuffiat aamma Elite Sport Greenland akuersaanngitsumik akinerat tunuliaqutaralugu.
Taakkua aperineqarsimapput, timersornermi atortussanik pitsaasunik allani amigaateqartoqartillugu, arsaattarfinnut aningaasanik atuinissaq naleqquttuunersoq.
- Qanoq aperisoqarsimanersoq qanorlu akisoqarsimanersoq paasiniarlugu Naalakkersuisoqarfimmut ujartuisimavugut. taakkualu ajoraluartumik eqqarsalersitseqqajaapput, akissummik aalajangersimasumik ujartuisoqarsimasoq, Niels Thomsen oqarpoq.
Taannalu tassa naapertorlugu maanna Ilaqutariinnermut, Kultureqarnermut, Ilageeqarnermut Naligiissitaanermullu Naalakkersuisoqarfiusup soqutigisaqaqatigiit naaggaartumik isummeqqullugit sunnerniarsimavai.
Tassa ivigaasalinnik arsaattarfiliornissamik tapersersuigaanni assersuutigalugu timersortarfiit iluarsaannissannut naggaartoqassasoq ilimanarsisikkamiuk.
Kultureqarnermut Ilageeqarnermullu allaffimmi siunnersorti Ivan Burkal aperisuuvoq, "timersornermi atortussanik pitsaasunik allani amigaateqartoqartillugu, arsaattarfinnut aningaasanik atuinissaq naleqquttuunersoq". Taassumalu isornartorsiut tusaannarlugu paasiuminaatsippaa.
- Imaanngilaq taamannak allakkama, taava aalajangersimasumik sammivilimmik akissuteqassasut. Namminerluinnaq akisussaapput, Ivan Burkal oqarpoq.
Aperaarpullu paasisinnaannginneraa, allamut taava naaggaartariaqalertutut misigisimasinnaammata?
- Naamik, tassa qinigassaqanngilaq, Ivan Burkal akivoq.
Ivan Burkalilu tassa erseqqissaavoq, imaanngitsoq illoqarfinni pingasuni ivigaasalinnik arsaattarfiliornissamut angeraanni, illoqarfinni nunaqarfinnilu allarpassuarni timersornermi atortussanik iluarsaassinisssamut naaggaarnerusoq.
Kisianni Namminersorlutik Oqartussani siunnersortip nassuerutigiartuaarpaa, oqaatsit atukkani ima paasineqarsinnaasut, timersortartut soqutigisaqaqatigiiffii aningaasanik atuinissamut pingaarnersiueqquneqartut.
- Taava taamatut paasineqarsinnaasoq arlaat isumaqarsimappat, taava taamaanniarli. Paasinerlunneqarsinnaasoq paasiinnarpara, tullissaaanilu allaanerusumik apereriaaseqartariaqassaagut, Ivan Burkal oqarpoq.
Tassalu Namminersorlutik Oqartussani siunnersortip Ivan Burkalip, politikerit siunnersuutaat pillugit tusarniaasoqaqqilerpat, qanoq apeqqusiussanerluni eqqarsaatigeqqinniarpaa.
- Isumaqartoqarpat, oqaaseqatigiit taakkua ataatsit pissutigalugit suliaq allamut sangutinneqartoq, taava uanga naammaginanngitsutut tusaatissatut tiguinnartariaqarpata. Taava taamaalli. Uangali isumaqarpunga, una sorujussuanngortinneqartoq. Tassami aalajangersimasumik akissutisinissamik naatsorsuuteqarneq siunertaasimanngisaannarpoq, Ivan Burkal oqarpoq.
Naallu Naalakkersuisut, IA, Atassullu naaggaaraluartut, Demokraatit siunnersuutaat Siumup peqaataaneratigut amerlanerussuteqartunit akuerineqartussanngorpoq.
