Eqqartuussiviit qullersaat: Iviangeersittussaq pisortanit naammaginartumik ilisimatinneqarpoq

Suliaritinniartut suliaritinnissaq sioqqullugu suliaritinnissamut periarfissat assigiinngitsut pillugit ilisimatinneqarnissaminnik pisinnaatitaaffii pillugit suliami tunngaviusumi Eqqartuussiviit qullersaannit tamanna naqissuserneqarpoq.

Arnaq iviangimigut kræfteqarnini pissutigalugu Nuummi Dronning Ingridiup Napparsimmavissuani 2005-imi iviangeersippoq.

Arnallu kingorna nakorsaaneq, Dronning Ingridiup Napparsimmavissua Peqqissutsimullu naalakkersuisoqarfik eqqartuussivimmut suliassanngortippai, Danmarkimi misissortinnissaminut periarfissaqarneranik immaqalu iviangia atatiinnarlugu suliaritissinnaanerminik nakorsaanermit ilisimatinneqarsimannginnini pissutigalugu.

Arnalli Danmarkimi periarfissat pillugit ilisimatinneqarnissaa pisussaaffigineqanngitsoq Eqqartuussiviit qullersaannit maanna naqissuserneqarpoq, taamaammat aamma narrujuummisitaanermut taarsiissutinik taartisiassanilluunniit tunniussinissamut tunngavissaqanngilaq.

Inatsisartut peqqussutaat naapertortolugu, katsorsartinnissamut periarfissat nunatsinni peqqinnissaqarfiup nunatsinni nunaniluunniit allani neqeroorutigisai kisiisa ilisimatitsissutigissallugit pisussaaffigaa.

Nunatta Eqqartuussisuuneqarfiata eqqartuussutaa taamaalilluni Eqqartuussiviit qullersaannit isumaqataaffigineqarpoq.