Ivâna Meincke aningaasarsiutigalugu Islandimi assammik arsartartuulerpoq

Ivâna Meincke Islandimi pikkorinnerni unammisartunut Stjarnanimut ukiuni marlunni atuuttussamik isumaqatigiissusiorpoq.

Taamaasilluni ukiorpassuanngortuni arnani assammik assammik arsartuni pikkorinnerni unammisartuunissamut isumaqatigiissusiortoqarpoq.

- Nuummi VM-mut anngunniunnerup kinguninngua Stjarnanimiit attavigineqarpunga taakkununnga nuukkusunnersunga, Ivâna Meincke ukioq unammiffiusoq kingulleq Islandimi pikkorinnerit tulliiniittuni FH-mi unammisartuusoq oqaluttuarpoq.

- Isumaqatigiissutip inissinniarnera sivisuvoq. Tamanna uannut nutaarluinnaavoq aammalu isumaqatigiissutip inissinniarnerani isumaqatigiissusiussisartoq ikiorsiullugu isumaqatigiissut naammassiniarnikuugatsigu, oqarpoq.

Ivâna Meincke siornatigut Nuummi GSS-mi unammisartuuvoq sulili ukioqqortunani Danmarkimut nuulluni assammik arsarnermi inerisarpoq.

Tunniutiinnajuitsoq

Aamma ukioq ataaseq Savalimmiuni unammisartuuvoq tamatumalu kingorna Islandimi assammik arsartartuulerluni.

Maanna tassa siullerpaamik akissarsiutigalugu unammisartutut isumaqatigiissusiorpoq.

Ukiualuit matuma siorna Ivâna Meincke annertuumik ajoqusernermik aqqusaagaqarpoq, taamaattorli timersuut nuannarisani aalluttuarlugu.

- Tulluusimaarnartorujussuuvoq aamma aqqutaa ajornanngittuaannarnikuunnginnami, Ivâna Meincke oqarpoq.

- Ajoqusernerit aqqusaartarnikuugakkit takutippara tunniutiinnanngikkaanni angusaqartoqarsinnaasoq.

Peqatigiiffiup neriuutai

Peqatigiiffik peqataaffigiligaa kalaalersaminut titarnerup killinganiittartumut aamma isumalluarpoq.

- Assorsuaq nuannaarutigaarput Ivâna Meincke iligiinni peqatigileratsigu, Stjarnanimi sungiusaasoq Sissi Jonsson oqarpoq.

- Piginnaasai saassussinermi assersuinermilu iluaqutigissavagut. Tunniusimasuuvoq inutsialaallunilu, oqarpoq.

Ivâna Meincke nunanut allanut unammisartuni novemberip naanerani VM-qataasussani toqqarallakkanut ilaavoq.

- Ukiumi unammiffiusumi sapaatip akunneranut ikinnerpaamik ataasiarluta unammisartussaavugut. Misilittakkat nunanut allanut unammisartuni iluaqutigissaqaakka uangalu nammineq aamma assammik arsartartutut ineriartorninni iluaqutigissaqalugit, Ivâna Meincke oqarpoq.